Pas ngjarjes së rëndë në Velçan të Pogradecit, babai i 26-vjeçarit Erzen Torra  ka dyshimin e fortë se ata I kanë vrarë.

Në një intervistë për Panorama ai arsyeton kështu:

“Shkonin për mrekulli. Unë s’i kam parë asnjëherë të zihen. Tani si çdo çift i ri kishin ndonjëherë grindje, ndonjë mërzitje të vogël me njeri-tjetrin, por asnjëherë nuk mund të thuash që ziheshin ashpër apo gjëra shqetësuese. Ata e donin shumë njeri-tjetrin dhe sidomos nusja ishte e urtë. Nuk ia kisha dëgjuar ndonjëherë zërin, vetëm qeshte. Unë dhe ime shoqe e donim si vajzën tonë. Ajo ishte e vogël, por mbante gjithë peshën e familjes.”

Po për fëmijët, kush po kujdeset?

“Më dhemb shpirti për ata fëmijë. Nuk janë pa njeri, që të thuash kush do të kujdeset por fatkeqësi është që mbetën jetimë pa nënë e babë. Kanë gjyshër e njerëz të tjerë që do t’i rritin, por unë nuk do të di çfarë të them kur të më pyesin për prindërit e tyre. Çfarë t’u them kur as unë vetë nuk e di?

Policia të hetojë si duhet dhe të nxjerrë të vërtetën. Unë dyshoj që dikush tjetër mund t’i ketë vrarë dhe i ka bërë gjërat të duken kështu. Konflikte me të tjerë ne nuk kishim me sa di unë, por përsëri nuk i dihet. Kam dyshime shumë të forta se dikush i ka vrarë.”