Ekzistenca e dy kombëtareve të futbollit, Shqipërisë dhe Kosovës, mesa duket ka krijuar edhe përplasje mediatike mes mediave në Shqipëri dhe në Kosovë.
Një titull lajmi i televizionit ‘Top-News’ që e cilëson “të salduar” nga Kosova vendin e fundit në grup, ka shkaktuar pakënaqësi tek mediat kosovare.
Media “Koha.net” e ka quajtur tallje këtë titull të Top-News dhe shkruan se gjatë gjithë këtyre viteve Kombëtarja Shqiptare është renditur e fundit në grup dhe sipas medias në fjalë u desh që në ekip të shkonin lojtarët nga Kosova që Shqipëria të merrte pjesë në Euro2016.
Ja çfarë shkruan media kosovare “Koha.net”:
Televizioni privat i lajmeve nga Tirana, Top News ka zgjedhur të tallet me pozicionin e Kosovës në debutimin e saj në arenën ndërkombëtare të futbollit, raporton Koha.net.
“Saldohet” vendi i fundit në grup, vlerëson ky televizon pas humbjes së Kosovës nga Ukraina. Në këtë mënyrë, vetëm pas ndeshjes së tretë Top News parashikon që Kosova do të përfundojë në vendin e fundit, që e bashkëndan me Finlandën.
Përndryshe, Shqipëria zakonisht për dekada të tëra ka përfunduar në vendin e fundit në grupe, derisa gjenerata e re e lojtarëve nga Kosova e ka dërguar në Euro 2016.
© SYRI.net