Një studim nga studiuesit në Universitetin e Torontos ka ngritur shqetësime në lidhje me potencialin për një rritje të konsiderueshme të aksidenteve fatale automobilistike të lidhur me eklipsin e ardhshëm diellor në prill. Duke analizuar të dhënat e trafikut rrugor nga eklipsi diellor i vitit 2017, studimi zbuloi një rritje të madhe të vdekjeve në rrugë në Shtetet e Bashkuara në ditët para dhe pas ngjarjes qiellore.

Gjatë javës së eklipsit diellor në vitin 2017, kishte të paktën 189 vdekje në aksidentet rrugore çdo ditë, krahasuar me normën mesatare ditore prej rreth 114 vdekjesh. Rritja e numrit të viktimave iu atribuua vëllimit të shtuar të udhëtarëve, pasi miliona njerëz u dyndën drejt qyteteve për të parë eklipsin.

Eklipsi i ardhshëm, që do të ndodhë me 8 prill, pritet të tërheqë mbi 3.7 milionë njerëz në 14 shtete, duke përfshirë Texas-in, Indianën dhe Maine-in. Texas-i është një vend kryesor për shikimin e eklipsit, ai parashikon fluksin më të lartë të udhëtarëve, duke filluar nga 270,000 në një milion vizitorë.

Rritja e udhëtarëve ka çuar në një rritje të kërkesës për makina me qira dhe akomodime në hotele, duke sjellë rritje çmimesh, sidomos në qytete si Dallasi, ku prenotimet e hoteleve panë një rritje prej 571%.

Gjetjet e studimit nënvizojnë rrezikun e shtuar të aksidenteve të trafikut gjatë periudhës së eklipsit, të krahasueshme me festat kryesore si Dita e Falënderimeve dhe Dita e Përkujtimit. Rritja e numrit të viktimave në rrugë i atribuohet faktorëve të ndryshëm, duke përfshirë rritjen e volumit të trafikut, mosnjohjen e rrugëve, shpejtësinë dhe shpërqendrimin.

Pavarësisht nga rritja e vërejtur e vdekjvee, studimi vuri në dukje kufizime në mbledhjen e të dhënave, veçanërisht në lidhje me përplasjet më pak të rënda. Megjithatë, studiuesit theksuan rëndësinë e kujdesit për të gjithë shoferët, madje edhe ata që nuk ndjekin drejtpërdrejt ngjarjet e eklipsit, pasi fluksi i udhëtarëve mund të ndikojë në sigurinë rrugore në mbarë vendin.

Në pritje të ndërprerjeve të mundshme, Administrata Federale e Aviacionit lëshoi paralajmërime udhëtimi për aeroportet përgjatë shtegut të eklipsit, duke përmendur vonesat e mundshme dhe ndryshimin e rrugës nga 7 prilli deri më 10 prill. Zyrtarët shtetërorë shprehën gjithashtu shqetësime për ndërprerje të mundshme në shërbimin celular për shkak të grumbullimit të madh të spektatorëve të eklipsit.

Ndërkohë që po bëhen përpjekje për të zbutur rreziqet dhe për të garantuar sigurinë publike, studimi thekson nevojën për ndërgjegjësim të shtuar dhe masa paraprake për të minimizuar rrezikun e aksidenteve të trafikut gjatë periudhës së eklipsit diellor./Daily Mail - Syri.net