Djali i Maradonës: Ata që e lanë të vdiste, duhet ta paguajnë dhe të vuajnë dënimin

Dje, në kryeqytetin e Argjentinës, Buenos Aires, nisi procesi gjyqësor ndaj stafit mjekësor që është kujdesur për Diego Armando Maradonën, me synimin për të hedhur dritë mbi vdekjen e ish-kampionit të Napolit. Maradona ndërroi jetë nga një infarkt në shtëpinë e tij në vitin 2020, kur ishte 60 vjeç.

"Për mua është një ditë e ndërlikuar dhe e vështirë," tha Diego Armando Maradona Jr. përmes gazetës La Repubblica.

"Për shkak të punës, nuk mund të jem në Argjentinë, por jemi të kënaqur që gjyqi më në fund ka filluar. Nuk ishte e lehtë. Ne kërkojmë drejtësi. Të gjithë ata që e kanë lënë të vdesë, sepse kështu ka ndodhur, duhet të paguajnë dhe të vuajnë dënimin.

Kemi besim në drejtësinë argjentinase dhe tek avokatët që na përfaqësojnë të gjithë ne, fëmijët e tij. Babai im duhet të prehet në paqe, por për shkak të këtyre njerëzve nuk po e bën dot. Fajtoret duhet të dënohen. Do ta ndjek procesin me shumë vëmendje dhe kam besim se gjithçka do të zgjidhet në mënyrën më të mirë të mundshme.”

Prokurorët argumentojnë se vdekja e Maradonës mund të ishte shmangur dhe akuzojnë personelin mjekësor për neglizhencë profesionale. Sipas akuzës, ka prova të forta që tregojnë se stafi mjekësor nuk e ka kryer detyrën siç duhet për të parandaluar vdekjen e tij.

Prokurori Patricio Ferrari deklaroi:

"Diego Armando Maradona, fëmijët e tij, të afërmit, njerëzit më të afërt dhe populli argjentinas meritojnë drejtësi."

© SYRI.net

Lexo edhe:

• VIDEO/ Zvicra kalon në avantazh të dyfishtë ndaj Kanadasë, realizojnë Vargas dhe Manzambi
• Messi lë të hapur derën për Botërorin 2030: Nuk e di, nuk po mendoj për këtë tani
• Ronaldo dhe Karimov hyjnë në histori, Botërori regjistron një duel unik mes dy brezave