Statistikat/ Rasti i çuditshëm, Lautaro e Thuram nuk shënojnë prej kohësh në një ndeshje

Dyshja Lautaro Martinez-Marcus Thuram ka qenë një bekim për Interin dhe trajnerin Simone Inzaghi gjatë sezonit të kaluar, ku argjentinasi ishte golashënuesi më i mirë i kampionatit, ndërsa shoku i tij i skuadrës u bë një faktor vendimtar në ecurinë që çoi zikaltrit drejt triumfit në Itali.

Megjithatë, ekziston një statistikë interesante, e përmendur nga "Gazzetta dello Sport," sipas së cilës ka kaluar një kohë e gjatë që këta dy sulmues nuk kanë arritur të shënojnë në të njëjtën ndeshje. O shënon Lautaro, o Thuram, kështu tregon fusha.

Ndeshja kundër Lazios në "Olimpico" mund të jetë mundësia më e mirë për të thyer këtë seri: një vit më parë, pikërisht në këtë periudhë, skuadra e Inzaghit mposhti bardhekaltrit falë golave të tyre.

Këtë sezon, Lautaro Martinez dhe Thuram janë alternuar në rolin e liderit të Interit, edhe pse francezi ka pasur pa dyshim më shumë ndikim se kapiteni zikaltër.

Dyshja nuk ka arritur të shënojë së bashku në të njëjtën ndeshje që prej fillimit të sezonit aktual, por në fakt, që nga pjesa e dytë e sezonit të kaluar Lautaro dhe Thuram nuk kanë mundur të gjejnë rrugën e golit "njëkohësisht".

Hera e fundit kur shënuan së bashku ishte në ndeshjen Frosinone-Inter, të cilën Interi e fitoi 5-0. Kanë kaluar 219 ditë që atëherë.

Interi do të përballet sonte me Lazion në "Olimpico," dhe Inzaghi shpreson të përsërisë atë që ndodhi sezonin e kaluar, kur më 17 dhjetor skuadra e tij mposhti ish-ekipin e tij 2-0.

Autorët e dy golave atëherë ishin pikërisht Lautaro Martinez, i cili zhbllokoi ndeshjen në fund të pjesës së parë, dhe Thuram, që vulosi rezultatin në pjesën e dytë. Lautaro dhe Thuram pritet të jenë titullarë, dhe kush e di, ndoshta pas më shumë se 200 ditësh, do të "gëzojnë" sërish së bashku duke shënuar të dy.

Lautaro Martinez po kalon një sezon nën pritshmëritë në nivel personal. Kapiteni i Interit ka realizuar gjashtë gola në Serinë A dhe Champions League në 18 paraqitje, duke shtuar edhe katër asistime. Goli i tij i fundit daton më 3 nëntor, kundër Venezias në "San Siro."

Nga ana tjetër, Thuram ka qenë në formë të shkëlqyer si finalizues. Sulmuesi francez ka treguar rritje në aftësinë për të qenë vendimtar para portës, siç dëshironte Inzaghi. Thuram ka arritur shifrën e dyfishtë të golave: 11 në të gjitha kompeticionet, prej të cilëve 10 në Serinë A dhe 1 në Champions League. Ai ka shënuar në dy ndeshjet e fundit të Interit kundër Parmës dhe Veronës.

© SYRI.net

Lexo edhe:

• Ronaldo ‘Fenomeni’ me batutë për Messin: Në moshën e tij unë peshoja 120 kilogramë
• FOTO/ Topi i ‘Dorës së Zotit’ të Diego Maradonës del në ankand, shifra stratosferike
• Klose reagon pasi Messi i theu rekordin e golave në Botëror: I heq kapelen!