Lideri i opozitës Sali Berisha deklaroi se të rinjtë do të jenë fytyra e Partisë Demokratike në këto zgjedhje dhe shprehu angazhimin për rikthimin e të rinjve në atdhe. Gjatë një tryeze në selinë blu, Berisha deklaroi se të rinjtë do të jenë pjesë substanciale e qeverisjes së Partisë Demokratike pas 11 majit. Berisha shpalosi disa nga pikat e programit ekonomik për mbështetjen e të rinjve ku veçoi garantimin e kredive të buta për çdo çift të ri për blerjen e banesave.
Nga SYRI TV
Lideri i opozitës Sali Berisha deklaroi se Partia Demokratike është e angazhuar në një politikë e cila synon kthimin e të rinjve në atdhe. Gjatë një tryeze të organizuar nga Departamenti ‘Brain Gain’ në bashkëpunim me Lidhjen Demokratike të Gruas dhe Forumin Rinor të Partisë Demokratike, Berisha tha se fytyra e fushatës së opozitës në këto zgjedhje do të jenë të rinjtë.
‘Tani ne jemi në fushatë zgjedhore dhe kam folur me drejtuesit, dhe e kuptojmë se fytyra e fushatës tonë, të jetë fytyra juaj, shëmbëlltyra e fushatës tonë të jetë fytyra juaj dhe mendoj se kjo është gjëja më e mirë.
Puna më intensive gjatë këtyre 40 ditëve, do të bëhet prej jush, sepse dinamizmi juaj është jetësor dhe do të tregojë shëmbëlltyrën e vërtetë të PD.
Ne do të jemi të angazhuar ndaj një politike, e cila do të kthejë të rinjtë shqiptarë, kudo që ndodhen, kudo ku punojnë në botë’, tha kreu i PD-së.
Berisha deklaroi se të rinjtë do të jenë pjesë substanciale e qeverisjes së Partisë Demokratike pas 11 majit. Lideri demokrat u ndal edhe në disa nga pikat e programit të opozitës për mbështetjen e të rinjve.
‘Ne do mundësojmë kredi të buta për çdo çift të ri, për banesë. E di se çmimet sot janë shumë të larta dhe duket se banesa është mollë e ndaluar, megjithatë ne do të ofrojmë mundësi reale për ju, me mbështetje financiare dhe kredi të buta.
Ne do të bëjmë gjithçka që politika e fëmijës së tretë, të jetë mbështetje që për fëmijën e tretë shteti të japë mbështetjen e tij deri në moshën 23 vjeçe.
Çdo i ri, apo çdo emigrant do të trajtohet pa dallime nëse do të vijë për të investuar në Shqipëri, nuk do të taksohet për 5 vite. Ne do të punojmë që ti rikthejmë në Shqipëri.
Kundërshtarët tanë kanë kopjuar programin tonë, por ata janë gënjeshtarë dhe të korruptuar dhe në këtë mënyrë e trajtojnë programin.
Kanë 12 vite në pushtet dhe nuk kanë ofruar asgjë tjetër veç se kanë dëbuar të rinjtë nga vendi’, theksoi lideri i demokratëve, Sali Berisha.
Berisha theksoi se rikthimi i Tik Tok do të jetë vendim i parë i qeverisë së re teksa theksoi se çdo diktaturë fillon me censurën.
‘Ky person 2 metra i gjatë, me atlete që të duket piktor dhe sportist në arenën ndërkombëtare, është djali i babit të tij i cili në 10 gusht 1988, firmosi varjen e poetit disident Havzi Nela.
Megjithatë djali nuk mund të jetë përgjegjës për veprat e babait, por ai duhet të kërkojë falje për dënuar atë që ka bërë babai i tij.
Edi Rama nuk e ka bërë kurrë këtë, përkundrazi ai ka thënë se; babai im ishte në anën e duhur të historisë.
Pra ai ka një marrëdhënie të vështirë me të rinjtë.
Vendimi i parë do të jetë hapja e Tik Tok sepse, duke goditur këtë platformë për qëllime censure të gjithë duhet ta dinë se, çdo diktaturë fillon me censurën’, nënvizoi kryetari i PD-së, Sali Berisha.
Lideri i opozitës theksoi se sot, çdo i ri duhet të votojë për ta lënë Edi Ramën në të kaluarën.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Sanchez dhe Rama nën presion: Skandale, protesta dhe një krizë konsensusi
4.9 mln euro investim në ‘Edith Durham’/ Xhixho: Mxënësit mund t’i rikthehen mësimit me dy turne
‘I tmerruar’/ Berisha: Rama e deformoi projektin ‘Smart City’ për të vendosur nën kontroll të plotë qytetarët