VIDEO/ Saraçi: Arrestimi i Metës dhe Çyrbjes, dy standarde të ndryshme, drejtësia dhe policia po veprojnë jashtë kornizës ligjore

Kryeredaktori i SYRI TV, Romir Saraçi, ishte i ftuar në emisionin ‘Task Force’ me moderatoren Sonila Meço, ku bëri disa komente të rëndësishme lidhur me situatën e fundit që përfshin arrestimin e ish-presidentit Ilir Meta. Në këtë intervistë, Saraçi ngriti pikëpyetje të mëdha mbi mënyrën e arrestimit të Metës, duke theksuar disa çështje që, sipas tij, përbëjnë precedentë të rrezikshëm ligjorë dhe politikë në vend.

Gjatë fjalës së tij, ai theksoi faktin se deri më tani, prokurorët nuk i kanë komunikuar Metës një akuzë konkrete ose një episod të qartë për të cilin ai akuzohet. “Zoti Ilir Meta shkon në burg pa një akuzë,” u shpreh Saraçi, duke shtuar se kjo krijon një situatë ku askush nuk di saktësisht se për cilën vepër penale apo episod Meta është nën hetim. Kjo e vendos Metën në një status të paqartë, si person nën hetim pa akuzë, një situatë që, sipas Saraçit, mund të ndodhë me këdo nëse institucionet e drejtësisë vazhdojnë të veprojnë në këtë mënyrë.

Kryeredaktori i SYRI TV argumentoi se kjo është një shkelje e rëndë e të drejtave të njeriut dhe e kodit të procedurës penale. Ai e cilësoi këtë rast si një precedent shumë të rrezikshëm, duke nënvizuar se arrestimi i një personi pa prova apo një akuzë të qartë është një praktikë që mund të hapë dyert për abuzime të mëtejshme. Saraçi gjithashtu ngriti shqetësime mbi mënyrën sesi po merret masa e sigurisë për Metën, duke e konsideruar këtë si një shkelje e qartë të procedurave ligjore të përcaktuara në kodin penal.

Në vijim të diskutimit, Saraçi theksoi se procesi i arrestimit të Metës ishte krejtësisht politik. Ai bëri një krahasim të dukshëm mes arrestimit të demonstrativ të Metës, ku pamjet dhe videot e arrestimit u transmetuan në kohë reale, dhe arrestimit të deputetit socialist Jurgis Çyrbja, për të cilin nuk pati asnjë pamje publike. Sipas Saraçit, kjo tregon një instrumentalizim politik të Policisë së Shtetit, e cila u përdor për të paraqitur arrestimin e Metës në një mënyrë demonstrative për qëllime politike.

Saraçi gjithashtu theksoi se kjo mënyrë e veprimit nga institucionet e drejtësisë konfirmon akuzat që janë artikuluar nga figura të tjera politike, si avokati Gjokutaj dhe Monika Kryemadhi, të cilët kanë shprehur shqetësime se kemi të bëjmë me një proces të pastër politik. Ai bëri thirrje që, nëse ka diçka për t’u hetuar, drejtësia duhet të veprojë sipas ligjit dhe të shkojë deri në fund, por kjo duhet të bëhet në mënyrë transparente dhe të ndershme.

Gjithashtu ai nënvizoi se institucionet e drejtësisë dhe Policia e Shtetit nuk po veprojnë sipas normave ligjore, dhe kjo po e dëmton besimin e publikut në procesin e drejtësisë në vend.

'Zoti Ilir Meta shkon në burg pa një akuzë. Prokurorët deri më sot nuk i kanë komunikuar zotit Meta një akuzë apo një episod për të cilin ai akuzohet.

Pra, askush sot nuk di të thotë se cili është episodi apo vepra penale që ka konsumuar zoti Meta, e cila t’i jetë komunikuar atij. Zoti Meta sot është në statusin e personit nën hetim. Një person nën hetim, pa akuzë, mbahet në burg, dhe e njëjta gjë mund të ndodhë me këdo prej nesh, që të mbahemi në burg derisa SPAK të ngrejë një akuzë, të krijojë prova, etj.

Kjo është një precedent shumë i keq, dhe nëse do flasim për precedentë, një precedent shumë i rrezikshëm që mbetet të interpretohet nga juristët është edhe kjo mënyrë e arrestimit dhe e marrjes së masës së sigurisë në arrest, që është një shkelje e kodit të procedurës penale, me aq sa kam lexuar dhe jam konsultuar me juristë.

Pjesa tjetër është komplet politike. Ajo çka më ka bërë përshtypje këto dy ditë është mënyra e arrestimit. Ndodhi fiks dy ditë pas asaj të zotit Jurgis Çyrbja, deputetit të PS-së, dhe pamë dy momente: Zoti Meta u arrestua në mënyrë demonstrative në mes të Tiranës dhe pati një kujdes të veçantë për xhirimin e pamjeve, të videove dhe transmetimin e tyre në kohë reale. Nga ana tjetër, nuk pamë ndonjë pamje të zotit Çyrbja. Dhe çfarë ndodhi? Në momentin që filloi reagimi i opinionit publik për mënyrën se si u arrestua, Policia e Shtetit shpërndau për mediat një video. Çfarë është kjo? Instrumentalizim politik i Policisë së Shtetit, që konfirmon të gjithë sjelljen e tyre karshi zotit Meta.

E dyta, kalojmë te pjesa e procesit gjyqësor, masat e sigurisë dhe shpërndarja e kërkesës për masë sigurie që përfshin disa elemente. Që në seancën e parë, prokurorët kanë vendosur që materiali hetimor për Jurgis Çyrbjen është sekret hetimor, dhe sot e kësaj dite ne nuk kemi akses. Kjo ndodh vetëm me eksponentët e PS-së, ndërsa në rastin e zotit Meta, prokurorët kanë 3 prokurorë që kanë atë dosje dhe atë kërkesë, dhe gjyqtari i çështjes e shpërndan atë dhe sot bëjnë rolin e të interesuarit se kush e nxori. Ndërkohë, janë po ata prokurorë. Pra, kemi këto standarde të shumëfishta të vendosura brenda dy ditësh, që konfirmojnë ato akuza që i artikuluan si zoti Gjokutaj, edhe zonja Kryemadhi, që kemi një proces politik.

Nëse ka diçka për të hetuar dhe për të shkuar deri në fund, bujrum, të hetohet. Ne të gjithë atë e presim, që drejtësia të funksionojë, por kjo drejtësi dhe kjo polici nuk po bëjnë veprimet në rrugë ligjore, që të na mbushin mendjen se po veprojnë në kuadër të ligjit.'- u shpreh Saraçi.

© SYRI.net

Lexo edhe:

• Emigranti: Në ’90 protestoja kundër regjimit dhe babait të Edi Ramës, sot po protestoj kundër Ramës
• 'Rama jepe dorëheqjen'/ Shqiptarët në Milano sërish në protestë
• Berisha: Çdo demokrat të bashkohet me këtë protestë, me një kusht, jo si militant, por si qytetar