Orët e fundit për presidentin/Kurti përplaset me opozitën, vendi drejt zgjedhjeve?

Afati kushtetues për zgjedhjen e presidentit të Kosovës po shkon drejt përfundimit, ndërsa përplasjet politike mes pushtetit dhe opozitës janë rikthyer fuqishëm. Me vetëm pak ditë të mbetura deri më 28 prill, një marrëveshje duket gjithnjë e më e largët, duke rritur mundësinë e shkuarjes në zgjedhje të reja.

Kryeministri Albin Kurti ka akuzuar opozitën për bllokim të procesit dhe mospranim të rezultatit zgjedhor. Ai tha se legjislatura aktuale duhet ta zgjedhë presidentin dhe të shmangë një krizë të re politike.

Kurti bëri të ditur se ka ofruar kompromise konkrete për arritjen e një marrëveshjeje. Sipas tij, Lidhja Demokratike e Kosovës (LDK) i është ofruar posti i zëvendëskryeministrit, Ministria e Punëve të Jashtme dhe disa ministri të tjera. Ndërsa Partia Demokratike e Kosovës (PDK) i është propozuar posti i kryeparlamentarit në këmbim të votave për presidentin.

“Unë jam super gjeneroz”, deklaroi Kurti, duke shtuar se opozita nuk ka votat e mjaftueshme as për të propozuar një kandidat për president.

Ai gjithashtu theksoi se disa kandidatë nga Lëvizja Vetëvendosje kanë marrë më shumë vota se liderët opozitarë, duke e përdorur këtë si argument për legjitimitetin politik të shumicës.

Në anën tjetër, kryetari i Partia Demokratike e Kosovës, Bedri Hamza, deklaroi se për partinë e tij çështja e presidentit tashmë është e mbyllur. Ai akuzoi Kurtin për mungesë serioziteti dhe vullneti për zgjidhje.

“U kry ajo punë”, tha shkurt Hamza, duke bërë të qartë se PDK nuk pret më një marrëveshje.

Ndërkohë, kreu i Lidhja Demokratike e Kosovës, Lumir Abdixhiku, u shpreh se është i gatshëm për një marrëveshje politike, por vetëm nëse përfshihet qartë çështja e presidentit.

Sipas tij, diskutimet e deritanishme kanë qenë të përqendruara në ndarjen e posteve dhe jo në zgjidhjen e krizës.

Afati për zgjedhjen e presidentit skadon më 28 prill, sipas vendimit të Gjykatës Kushtetuese. Nëse deri atëherë nuk arrihet zgjedhja e kreut të shtetit, vendi do të shkojë në zgjedhje të reja.

Sipas Kushtetutës, presidenti zgjidhet me dy të tretat e votave në dy rundet e para, ose me 61 vota në rundin e tretë, por me kusht që në sallë të jenë të pranishëm të paktën 80 deputetë.

© SYRI.net

Lexo edhe:

• Kapet drogë me vlerë 60 mijë euro në Kaçanik, arrestohen dy shtetas të huaj
• Vdes në QKUK fëmija që ishte rrëzuar me trotinet elektrik në Gjilan
• Këto janë çmimet e derivateve për sot dhe nesër