Kurti: Fabrika e municioneve përfundon vitin e ardhshëm, municionet e para në fund të 2026-s

Kryeministri në detyrë, Albin Kurti, ka deklaruar se fabrika e re e municioneve në Jahoc të Gjakovës do të përfundojë brenda vitit të ardhshëm, ndërsa prodhimi i parë pritet të dalë në fund të vitit 2026.

Deklaratat u bënë gjatë mbledhjes së qeverisë të enjten, në Ditën e Forcës, ku u miratua vendimi për shpronësimin e pronave të paluajtshme të nevojshme për krijimin e zonës industriale të mbrojtjes.

Sipas Kurtit, miratimi i këtij vendimi hap rrugën për ndërtimin e fabrikës së parë të municioneve në Republikën e Kosovës, e cila do t’i shërbejë Forcës së Sigurisë së Kosovës dhe do të rrisë kapacitetet e mbrojtjes së vendit.

Ai theksoi se kontrata për fabrikën tashmë është nënshkruar me prodhuesin turk MKE.

“Me miratimin e saj, hapim rrugë në terren ndërtimit të fabrikës së municioneve, të parës së llojit të saj në Republikën e pavarur që do t’i shërbejë ushtrisë sonë, do ta rris sigurinë tonë dhe do t’i ngris edhe më tej kapacitetet tona mbrojtëse. Këtë vendim edhe më veçantë e bën fakti që po e miratojmë pikërisht në Ditën e Forcës”, deklaroi Kurti.

Ai shtoi se zona industriale nuk do të kufizohet vetëm te prodhimi i municioneve, por do të hapet edhe për investitorë të tjerë që synojnë prodhimin e pajisjeve ushtarake, përfshirë dronë ushtarakë dhe civilë “Made in Kosova”.

Kryeministri në detyrë gjithashtu nënvizoi rritjen e ndjeshme të investimeve në mbrojtje gjatë mandatit të tij, duke theksuar se buxheti i mbrojtjes është katërfishuar ndërsa numri i ushtarëve është dyfishuar.

Ai bëri të ditur se FSK-ja është pajisur me sisteme moderne armatimi nga shtete anëtare të NATO-s.

Kurti paralajmëroi se në mandatin e ardhshëm qeverisës, plani i investimeve në sektorin e mbrojtjes do të arrijë mbi 1 miliard euro.

“Duke rritur ushtrinë, e sigurojmë republikën. Duke rritur FSK-në, e forcojmë partneritetin me aleatët. Urime të gjithëve Dita e Forcës”, përfundoi ai.

© SYRI.net

Lexo edhe:

• Cakolli: Më shumë se gjysma e fushatës zhvillohet në rrjete sociale, partitë e raportojnë vetëm një ‘porcion’ të shpenzimeve
• 'Rama jepe dorëheqjen!' Marshimi protestë nuk ndalet - sot dita e 23-të
• VIDEO/ Shkullaku: Brenda partisë së autokratit të çmendur s’guxon njeri t’i thotë Ramës, o idiot, ik se more në qafë Shqipërinë