INTERVISTA/ Nello Trocchia për Alba Kepin: Kam kërkuar shpjegime nga Rama për takimin në Aruba, por s’kam marrë përgjigje

Nga Alba Kepi, Romë

Dy emra konkretë - ai i kryeministrit shqiptar Edi Rama dhe i biznesmenit të njohur Artur Shehu - janë në qendër të një letre anonime që ka mbërritur në Drejtoria Antimafia e Romës (DIA), dhe që aktualisht është nën shqyrtimin e autoriteteve italiane.

Autori i letrës, i cili vetëidentifikohet si ish-prokuror i Vlorës, përshkruan një takim të zhvilluar në Aruba, në janar 2019, ku thuhet se kanë marrë pjesë përfaqësues të lartë të qeverisë shqiptare, përfshirë kryeministrin Rama, si dhe figura të njohura të krimit të organizuar shqiptar, mes tyre Artur Shehu.

Sipas dokumentit anonim, që aktualisht po verifikohet nga autoritetet italiane dhe shqiptare, gjatë këtij takimi një kartel ndërkombëtar droge ka kërkuar mundësi për investime miliardëshe në Shqipëri me qëllim pastrimin e parave, dhe kërkesa është pranuar.

Në letër përmenden gjithashtu dy persona të dyshuar si ekzekutorë të atentatit kundër gazetarit italian Sigfrido Ranucci, ndodhur pak ditë pas botimit të librit investigativ të gazetarit Nello Trocchia, “Të Pamposhturit – Mafia shqiptare”, ku përmendet për herë të parë takimi në Aruba dhe roli i Artur Shehut si figurë kyçe e botës kriminale shqiptare.

Autoritetet italiane e konsiderojnë letrën si një pistë hetimore që po verifikohet, ndërsa nuk përjashtohet mundësia që ajo të jetë një tentativë për devijim të hetimeve.

Intervista e Alba Kepi me gazetarin investigativ Nello Trocchia

Në një intervistë ekskluzive për gazetaren Alba Kepi, gazetari italian Nello Trocchia shpjegon zhvillimet e fundit dhe rëndësinë e dokumenteve që ai ka analizuar në librin e tij.

Nello Trocchia: “Gjithçka që unë shkruaj në libër është ajo që ka evidentuar Direzione Investigativa Antimafia. Në vitin 2019, në Aruba, është dokumentuar një takim mes një karteli kriminal me praninë e Artur Shehut dhe disa përfaqësuesve të papërcaktuar të qeverisë Rama. Kjo është provë e DIA-s. Kam kërkuar publikisht që kryeministri Edi Rama të japë shpjegime për këtë takim, por nuk kam marrë përgjigje.”

Gazetari shton se pas atentatit ndaj Ranuccit, letra anonime përmendi pikërisht librin e tij si “shkak” për rihapjen e disa dinamikave kriminale.

“Letra më shqetësoi. Nuk di nëse pista shqiptare lidhet me atentatin, por në të përmenden dy emra konkretë si të dyshuar. Hetimet janë në fazë fillestare dhe autoritetet po kontrollojnë çdo pistë — nga materiali shpërthyes te kamerat e sigurisë,” – tha Trocchia.

Ai konfirmon se DIA dhe Prokuroria Antimafia e Romës kanë nisur bashkëpunimin me autoritetet shqiptare për të verifikuar informacionet dhe identitetin e autorit të letrës.

Kush është Artur Shehu

Sipas dokumenteve që ka analizuar gazetari italian, Artur Shehu është një personazh me ndikim në krimin ndërkombëtar shqiptar, i lidhur me rrjete trafiku dhe investime të dyshuara në Shqipëri dhe Itali. Ai jeton aktualisht në Miami, SHBA, dhe nuk ka dënime të formës së prerë.

“Shehu ka pasur role të rëndësishme në rrjete trafiku dhe pastrimi parash. Në Vlorë ka investuar në resortin ‘Crystal’ dhe prona të tjera. Dokumentet flasin për lidhje të mundshme me figura të botës kriminale italiane,” – shpjegon Trocchia.

Hetimet italiane ndaj njerëzve të afërt me Shehun janë mbyllur për shkak të afateve ligjore, por sipas gazetares italiane, çështja mund të rihapet nëse dalin elementë të rinj.

“Në përgjimet e hetimit italian përmenden projekte në Vlorë, ndërhyrje në Kadastrën shqiptare dhe përpjekje për të ndikuar mbi vendimmarrjen administrative. Ishte një hetim kompleks që përfshinte edhe pista në Belgjikë, Holandë dhe SHBA,” – përfundon Trocchia.

Autoritetet në pritje të verifikimeve

Burime nga Antimafia italiane bëjnë të ditur se verifikimet janë në zhvillim, dhe çdo element i ri do të kërkojë bashkëpunim të ngushtë me autoritetet shqiptare.
Letra anonime, libri investigativ dhe atentati ndaj gazetarit Ranucci janë aktualisht në qendër të vëmendjes së hetimeve italiane.

Alba Kepi: Pas intervistës së fundit, kanë ndodhur disa zhvillime: atentati ndaj Sigfrido Ranuccit dhe një letër anonime që ka mbërritur në drejtimin e DIA-s së Romës, ku përmendet libri juaj “Invincibili, mafia albanese” dhe një figurë kyçe e kriminalitetit shqiptar, si Artur Shehu. Përmendet gjithashtu takimi në Aruba ku dyshohet se kanë marrë pjesë edhe përfaqësues të qeverisë Rama.

Cfarë mund të themi sot për këtë letër dhe për të gjitha ngjarjet deri tani? Publiku shqiptar është shumë i interesuar.

Nello Trocchia: Faleminderit për vëmendjen. Pika e parë është kjo: gjithçka që unë shkruaj në libër është ajo që ka evidentuar Direzione Investigativa Antimafia.

Në vitin 2019, në Aruba, është dokumentuar një takim mes një karteli kriminal, me praninë e Artur Shehut, dhe disa përfaqësuesve të papërcaktuar të qeverisë Rama.

Këtë e kam botuar në libër dhe është provë e DIA-s, policia italiane më e specializuar kundër krimit të organizuar. Unë i kam kërkuar Edi Ramës të japë shpjegime: kush ishte në atë takim, çfarë dinte ai, çfarë lidhje kishte apo jo me Artur Shehun.

Nuk kam marrë përgjigje. Jam gati t’i dëgjoj sa herë të ketë sqarime.

Më pas ndodhi atentati i rëndë ndaj Ranuccit. Pas disa ditësh mbërriti një letër anonime, e publikuar nga gazeta Domani, e dërguar edhe në Prokurorinë Antimafia të Romës dhe DIA. Aty thuhet se libri im ka nxitur dinamika kriminale sepse kam zbuluar takimin Rama–Shehu në Aruba.

Letra më shqetësoi. Nuk e di nëse pista shqiptare lidhet me atentatin. Në letër përmenden edhe dy emra si ekzekutorë të mundshëm. Forcat italiane po hetojnë të gjitha pistat. Mund të jetë një gjurmë reale ose një tentativë për devijim.

Mafia shqiptare dhe ajo italiane janë gjithnjë e më të lidhura. Marrëveshja e fundit Itali–Shqipëri e bën edhe më të domosdoshme transparencën.

Alba Kepi: Në letër përmendet se ajo mund të jetë shkruar nga një ish-prokuror i Vlorës. Çfarë dimë?

 Nello Trocchia: Autori thotë se ka qenë prokuror në Vlorë, ka hetuar çështje të rëndësishme dhe ka pasur probleme sigurie. Ai përmend dy emra si ekzekutorë të mundshëm, që sipas kolegut tim gazetar që publikoi letrën, janë të njohur për autoritetet shqiptare.

Hetimi është në fazë fillestare: verifikohen kamerat e sigurisë, mjetet e përdorura, materiali shpërthyes, ai që është përdorur për bombën artizanale, krahasimet me atentate të tjera të mafias romane. Ende nuk ka pistë kryesore.

 Alba Kepi: A ka nisur bashkëpunimi mes autoriteteve italiane dhe shqiptare për këtë letër?

Nello Trocchia: Po, besoj se po. Është praktikë normale kur përmenden emra konkretë nga vende të ndryshme. Pika e parë që verifikohet është: këta persona janë  o ishin në burg apo të lirë kur ndodhi atentati?

Alba Kepi: Ju flisni shpesh për rolin e Artur Shehut në botën e krimit. Kush është ai sipas dokumenteve që keni parë?

Nello Trocchia: Artur Shehu është një figurë shumë e rëndësishme. Nuk ka dënime të mëdha të formës së prerë, jeton në Miami, e kam kontaktuar zyrtarisht për intervistë, por nuk kam marrë përgjigje.

Ai ka kaluar pa u prekur nga konfliktet e dhunshme të viteve ’90 në Shqipëri, ka pasur role pranë botës politike dhe më pas është ngritur në nivel që ka marrëdhënie me rrjete të trafikut ndërkombëtar. Në Vlorë ka pasur investime: resorti “Crystal”, prona, dhe sipas dokumenteve, ka bashkëpunëtorë në Shqipëri. Ka pasur lidhje edhe me figura të krimit italian, sipas hetimeve të mëparshme, megjithëse nuk është dënuar në atë çështje.

Këto tregojnë nivelin e tij të marrëdhënieve dhe ndikimit.

 Alba Kepi: Nëse Artur Shehu jeton në SHBA, kush mund të hetojë mbi të?

Nello Trocchia: Autoritetet italiane hetojnë për krime në territorin italian. Kur një person është jashtë vendit, si në SHBA, përfshihet bashkëpunimi ndërkombëtar. Nëse ka vepra penale në Shqipëri, është kompetencë e drejtësisë shqiptare. Por një figurë e këtij niveli kërkon bashkëpunim mes agjencive.

Alba Kepi: Si funksionon nga pikëpamja juridike? Artur Shehu është një person që sipas dokumenteve ka akuza për trafik ndërkombëtar, pastrim parash, biznese të dyshimta. A mund ta hetojë DIA italiane apo duhet të nisë gjithçka nga Prokuroria Shqiptare?

Nello Trocchia: Sa i përket hetimit që ka pasur mbi njerëzit e Artur Shehut, ai hetim është kryer në Itali. Procedura më pas është mbyllur, sepse kur dyshohet për një vepër penale të kryer në territorin italian, mund të hetohesh edhe nëse jeton jashtë vendit.

Ajo ishte një hetim shumë i vështirë, sepse përfshinte persona që vepronin në nivel ndërkombëtar. Kjo do të thotë që ke nevojë për bashkëpunim me forca të tjera hetimore dhe duhet të ndjekësh pista të ndryshme njëkohësisht.

Në atë hetim kishte disa drejtime: një segment për trafik droge, lidhur me njerëz të lidhur me Shehun, një segment për pastrim dhe investim parash në Itali për llogari të Shehut, dhe pastaj çështje që lidhen me marrëdhëniet me administratën dhe politikën në Shqipëri dhe vende të tjera europiane. Për shembull, në dosje dilnin emra avokatësh, lidhje të biznesit dhe kontakte administrative. E gjitha kjo e bënte hetimin shumë kompleks dhe e zgjaste kohën. Dhe për shkak të afateve ligjore, ai proces përfundoi me arkivim.

Është e qartë që Shehu mund të hetohet për krime të kryera në Itali. Në atë rast ishin njerëzit e tij që po hetoheshin për investimin e parave të tij si në Itali ashtu edhe në Shqipëri.

Në Shqipëri në përgjimet e asaj çështjeje flitej për: parkimin që do ndërtohej në Vlorë, resortin e tij,

dhe madje flitej edhe për Kadastrën, ku duhej “bindur” disa punonjës që kundërshtonin procesin e legalizimit të tokave apo lejeve.

Nga përgjimet ishte e qartë që kishte përpjekje për t'i bërë këta punonjës të merrnin vendime “me të mirë ose me të keq”.

Hetimi ishte i nivelit shumë të lartë. Mbyllja e tij është fakt, por është edhe një humbje përkundrejt rëndësisë së çështjes. Duhej vazhduar, por ka kufij ligjorë të kohës dhe marrëveshje ndërkombëtare që ndikojnë në këto procese.

Hetimet mund të rihapen nëse ka elementë të rinj, të dhëna të reja, sinjale hetimore ose vepra të reja që lidhen me atë çështje.

Ajo që di është se kjo hetim kishte edhe pista hetimore në Belgjikë dhe në vende të tjera të Europës Qendrore, sepse këta individë lëviznin mes Shqipërisë, Miamit, vendeve të Europës, Holandës, Belgjikës dhe Italisë.

© SYRI.net

Lexo edhe:

• Cakolli: Më shumë se gjysma e fushatës zhvillohet në rrjete sociale, partitë e raportojnë vetëm një ‘porcion’ të shpenzimeve
• 'Rama jepe dorëheqjen!' Marshimi protestë nuk ndalet - sot dita e 23-të
• VIDEO/ Shkullaku: Brenda partisë së autokratit të çmendur s’guxon njeri t’i thotë Ramës, o idiot, ik se more në qafë Shqipërinë