Ndryshimet klimatike mund ta bëjnë shkretëtirën më të lagësht se kurrë më parë

Dikur një nga peizazhet më të thata të planetit, Shkretëtira e Saharasë mund të bëhet shumë më e lagësht deri në fund të këtij shekulli.

Saharaja renditet ndër vendet më të thata në Tokë, ki bien vetëm rreth 7.5 centimetra reshje në vit, afërsisht sa një e dhjeta e sasisë që merr në Çikago nga shiu, breshëri dhe bora.

Megjithatë, shkencëtarët nga Universiteti i Illinois-it në Çikago (UIC) parashikojnë se ky peizazh i thatë mund të bëhet dukshëm më i lagësht në gjysmën e dytë të shekullit XXI.

Zbulimet e tyre, të botuara në revistën npj Climate andAtmospheric Science, sugjerojnë se Sahara mund të marrë deri në 75% më shumë reshje krahasuar me mesataren e saj historike. Studiuesit parashikojnë gjithashtu se, në skenarë ekstremë të ndryshimeve klimatike, reshjet do të rriten në pjesët juglindore dhe jug-qendrore të Afrikës.

“Ndryshimet në modelet e reshjeve do të ndikojnë te miliarda njerëz, si brenda ashtu edhe jashtë Afrikës,” tha autori kryesor, Thierry Ndetatsin Taguela, kërkues postdoktoral për klimën në Kolegjin e Arteve dhe Shkencave të Lira. “Duhet të fillojmë të planifikojmë për t’u përballur me këto ndryshime, nga menaxhimi i përmbytjeve deri te zhvillimi i të korrave rezistentendaj thatësirës.”

Taguela tha se kuptimi i mënyrës se si temperaturat në rritje ndikojnë mbi reshjet mund të ndihmojë në zhvillimin e strategjive të përshtatjes. Në studim, ai përdori një grup prej 40 modelesh klimatike për të simuluar reshjet verore në Afrikë gjatë gjysmës së dytë të shekullit XXI (2050–2099), duke i krahasuar me periudhën historike (1965–2014).

Taguela analizoi rezultatet e modeleve nën dy skenarë klimatikë: një që simulonte emetime të moderuara të gazeve serrë dhe një tjetër që simulonte emetime shumë të larta.

Skenarët dhe rezultatet

Të dy skenarët parashikuan se reshjet mbi Afrikë do të rriten përgjithësisht deri në fund të shekullit XXI, me disa ndryshime rajonale.

Në mënyrë të veçantë, reshjet në Shkretëtirën e Saharasë pritet të rriten me 75%, të ndjekura nga një rritje prej 25% në Afrikën Juglindore dhe 17% në Afrikën Jug-qendrore.

Nga ana tjetër, studiuesit presin që rajoni jugperëndimor të bëhet më i thatë, me një ulje të pritshme prej 5% në reshje.

“Sahara pritet të dyfishojë pothuajse nivelin e reshjeve të saj historike, gjë që është befasuese për një rajon kaq klimatikisht të thatë,” tha Taguela. “Por edhe pse shumica e modeleve bien dakord për prirjen e përgjithshme drejt kushteve më të lagështa, ekziston ende pasiguri e konsiderueshme në sasinë e reshjeve që ato parashikojnë. Përmirësimi i këtyre modeleve është thelbësor për të ndërtuar besim në parashikimet rajonale.”

Në përgjithësi, këto ndryshime të parashikuara lidhen me efektet e ndryshimeve klimatike, pasi temperaturat më të larta ndihmojnë atmosferën të mbajë më shumë lagështi, e cila më pas shton reshjet. Ndryshimet në qarkullimin atmosferik gjithashtu luajtën rol në reduktimin e reshjeve në disa zona.

“Kuptimi i mekanizmave fizikë që drejtojnë reshjet është thelbësor për zhvillimin e strategjive të përshtatjes që mund t’i rezistojnë si të ardhmes më të lagësht, ashtu edhe asaj më të thatë,” përfundoi Taguela. / Scitech Daily - Syri.net

© SYRI.net

Lexo edhe:

• Hashim Thaçi i qeshur në imazhin e fundit të ndarë nga djali i tij
• Vazhdon trendi i rënies së çmimit të naftës në Kosovë
• Cakolli: Më shumë se gjysma e fushatës zhvillohet në rrjete sociale, partitë e raportojnë vetëm një ‘porcion’ të shpenzimeve