Vetura merr flakë në Prishtinë, përfshihen edhe dy të tjera, komandanti i Zjarrfikësve: S’ka të lënduar

Një incident me zjarr ka ndodhur mbrëmjen e së premtes në Prishtinë, ku tri automjete janë përfshirë nga flakët. Fillimisht ishte raportuar për një veturë të djegur, por me të arritur në vendin e ngjarjes, zjarrfikësit kanë hasur tri vetura të përfshira nga zjarri.

Lajmin e ka konfirmuar për Sinjalin komandanti i Njësisë së Zjarrfikësve në kryeqytet, Samed Shkodra.

“Zjarrfikësit kanë pranuar informacionin se është djegur një veturë, mirëpo kur kanë arritur në vendin e ngjarjes, kanë qenë të përfshira tri vetura”, deklaroi Shkodra.

Sipas tij, dyshohet se automjetet e tjera janë përfshirë nga zjarri si pasojë e përhapjes së flakëve nga vetura e parë që mori flakë.

Fatmirësisht, nuk raportohet për të lënduar në këtë incident, por janë shkaktuar dëme të konsiderueshme materiale në veturat e përfshira.

“Zjarrfikësit tashmë janë kthyer nga intervenimi dhe çdo gjë është përfunduar. Nuk ka persona të lënduar, vetëm dëme materiale”, shtoi Shkodra.

Shkaqet e sakta të zjarrit mbeten ende të panjohura dhe pritet që autoritetet të nisin hetimet për rrethanat e ngjarjes.

© SYRI.net

Lexo edhe:

• Ministria e Infrastrukturës dështon në komunikim: Njoftime zyrtare plot gabime drejtshkrimore
• LIVE/ 'Rama jepe dorëheqjen!' Vijon protesta qytetare
• VIDEO-Investigimi i parë i Plug/ Vilma Nushi e Check up financoi kullën e babait të Ervin Matës