Prishtina sfidon Teheranin: Mjaft me provokime, kërkohet zgjidhje diplomatike!

Kosova me qëndrim të prerë ndaj Iranit: Ndalni veprimet hibride, zgjidhja është diplomacia

Qeveria e Kosovës ka reaguar pas përshkallëzimit të situatës mes Iranit dhe Izraelit, duke i bërë thirrje Teheranit që të ndalojë veprimet hibride që cenojnë stabilitetin rajonal dhe më gjerë. Në një deklaratë të Zyrës së Kryeministrit thuhet se zgjidhja diplomatike është rruga e vetme për të shmangur përhapjen e krizës dhe për të ruajtur sigurinë ndërkombëtare.

“Republika e Kosovës po e përcjell me shqetësim situatën e tensionuar mes Izraelit dhe Iranit dhe u bën thirrje të gjitha palëve të përfshira që të përmbahen, me qëllim të shmangies së përshkallëzimit të mëtejshëm të krizës së sigurisë në rajon”, thuhet në deklaratë.

Qeveria i është referuar edhe të dhënave të fundit të Agjencisë Ndërkombëtare për Energji Atomike (IAEA), ku konstatohet se Irani nuk po i përmbush detyrimet për mospërhapjen bërthamore. Në këtë kontekst, Kosova kërkon nga Teherani që të respektojë plotësisht detyrimet ndërkombëtare dhe të ndalë çdo veprim që rrezikon stabilitetin dhe paqen.

“Zgjidhja diplomatike është rruga e duhur për adresimin e çështjeve të sigurisë, ndaljen e dhunës dhe parandalimin e pasojave më të gjera rajonale e globale”, thuhet më tej.

Në deklaratë, Qeveria e Kosovës i bën thirrje qytetarëve të saj që ndodhen në rajon apo kanë kontakte atje, që të tregojnë kujdes të shtuar dhe të ndjekin me përpikëri udhëzimet e Ministrisë së Punëve të Jashtme dhe Diasporës, si dhe të autoriteteve lokale përkatëse.

Në përmbyllje, Kosova riafirmon përkushtimin ndaj vlerave të paqes, demokracisë dhe sigurisë ndërkombëtare, duke shprehur solidaritet me të gjithë qytetarët e prekur nga konflikti aktual.

© SYRI.net

Lexo edhe:

• Ministria e Infrastrukturës dështon në komunikim: Njoftime zyrtare plot gabime drejtshkrimore
• LIVE/ 'Rama jepe dorëheqjen!' Vijon protesta qytetare
• VIDEO-Investigimi i parë i Plug/ Vilma Nushi e Check up financoi kullën e babait të Ervin Matës