SYRI TV/ Rama i shqetësuar për rezolutën, sulmon Partitë Popullore Europiane!

Nga SYRI TV

Kryeministri Edi Rama ka sulmuar Partitë Popullore Europiane (PPE), që përfaqësojnë forcat drejtuese të Parlamentit Europian dhe Bashkimit Europian, për rezolutën e miratuar në kongresin e mbajtur në Valencia.

Në rubrikën “Sy më sy”, Rama e cilësoi rezolutën si një “fletë-rrufe”, ndërsa kjo e fundit paralajmëronte se zgjedhjet dhe demokracia në Shqipëri janë në rrezik.

Kryeministri është shfaqur sërish i shqetësuar nga kjo rezolutë, e cila kërkon ndërhyrje të menjëhershme nga Brukseli zyrtar. Në dokumentin e miratuar në kongresin e PPE-së, theksohet blerja e votave nga qeveria, keqpërdorimi i burimeve publike në periudhën parazgjedhore, përndjekja e liderëve të opozitës dhe kufizimi i lirisë së medias.

Ra dje boria në një mbledhje diku në Spanjë ku ishin mbledhur partitë simotra të kënetës që u ka mbetur këneta mes tyre dhe s’dinë as ato ça të bëjnë dhe këneta kaloi nëpër tavolina një fletërrufe, siç ndodh nëpër konferencat e partive dhe aty filloi avazi.  Filloi avazi mbledhje vote me lek dhe me kanabis, punësime elektorale dhe prokurorime favorizuese për mbështetësit e socialistëve, abuzime me detyrën dhe media, emërim ilegal i një kryetari të bashkisë, kërcënim dhe hetime kundra kandidatëve të opozitës.  Domethënë, një mal me broçkulla" tha Rama. 

Në vend që t’u përgjigjej qytetarëve që kërkojnë llogari për qeverisjen 12-vjeçare, Rama zgjodhi të sulmojë opozitën dhe strategun e fitores së Donald Trump, Chris LaCivita, i cili drejton aktualisht fushatën e Partisë Demokratike.

Rezoluta që ka vënë në alarm kryeministrin i bën thirrje BE-së, OSBE-së dhe Këshillit të Europës të:

Kërkojnë ndërprerjen e blerjes së votës dhe abuzimit me fondet publike;

Dërgojnë vëzhgues shtesë në bashkitë me rrezik të lartë;

Dokumentojnë publikisht dhe denoncojnë shkeljet zgjedhore;

Zbatojnë mekanizma kushtëzues në procesin e integrimit në BE në rast se shkeljet vazhdojnë.

© SYRI.net

Lexo edhe:

• Rama në panik, fillon punë si ‘Algoritëm’: Bëhet flamingo
• Prokuroria ngre aktakuzë për përgatitje të vrasjes së rëndë
• Haxhiu: Fillimisht formimi i qeverisë, pastaj zgjedhja e presidentit