Vdes Papa Françesku, një ditë pas kremtimit të Pashkës Katolike

Papa Françesku, udhëheqësi i parë i Kishës Katolike Romake në Amerikën Latine, ka vdekur, tha Vatikani në një deklaratë video të hënën, duke i dhënë fund një sundimi shpesh të trazuar të shënuar nga përçarje dhe tension ndërsa ai kërkonte të riparonte institucionin e fshehur.

Ati i Shenjtë ka ndërruar jetë në moshën 88-vjeçare në rezidencën e tij në Casa Santa Marta, në qytetin e Vatikanit, në ditën e së Hënës së Pashkëve.

Lajmi u bë i ditur zyrtarisht nga Vatikani përmes një postimi në rrjetet sociale:

“Papa Françesku ndërroi jetë të Hënën e Pashkëve, më 21 prill 2025, në moshën 88-vjeçare, në rezidencën e tij në Casa Santa Marta”.

Më herët, më 28 shkurt, Vatikani kishte bërë të ditur se Papa kishte kaluar një “krizë të izoluar bronkospazme”, e cila ishte shoqëruar me të vjella dhe përkeqësim të menjëhershëm të gjendjes së frymëmarrjes. Për shkak të bronkoaspirimit, ai ishte vendosur nën ventilim mekanik jo-invaziv dhe, sipas zëdhënësve, pati një përgjigje pozitive fillestare ndaj trajtimit.

Megjithatë, edhe pse ai qëndroi i vetëdijshëm dhe bashkëpunues me terapinë, mjekët e Vatikanit paralajmëruan se “prognoza mbetet e pasigurt”.

Papa Françesku, emri i lindjes Jorge Mario Bergoglio, ishte zgjedhur në fronin papnor më 13 mars 2013, duke u bërë Papa i parë nga Amerika Latine dhe jezuiti i parë në historinë e Kishës Katolike që udhëhoqi Selinë e Shenjtë. Ai do të mbahet mend për përulësinë, mesazhet e tij të forta për paqe, drejtësi sociale dhe kujdes për të varfërit, si dhe për thirrjet e tij të vazhdueshme kundër diskriminimit dhe shfrytëzimit të natyrës.

Bota katolike dhe mbarë opinioni publik ndërkombëtar ndan dhimbjen për ndarjen nga jeta të një prej figurave më të dashura dhe të angazhuara të shekullit XXI. Detaje të mëtejshme për homazhet dhe ceremonitë përkujtimore pritet të bëhen publike nga Vatikani në orët në vijim.

© SYRI.net

Lexo edhe:

• Skandali/ Taulant Balla paralajmëron deklaratë të Organizatës së Veteranëve të UÇK-së
• KQZ: Gati t’i shpallim rezultatet përfundimtare pasi të përfundojnë ankesat
• Armët dhe municioni i kapur në Zubin Potok, intervistohet edhe i dyshuari i dytë