Dënimi i Nezir Mehmetaj, Ministria e Jashtme i bën thirrje Serbisë që të ndalë veprimet arbitrare kundër qytetarëve të Kosovës

Të premten, shtetasi i Kosovës, Nezir Mehmetaj është dënuar nga autoritetet gjyqësore serbe me gjashtë vjet burgim, nën akuza për krime lufte. Ai u arrestua më 3 janar 2020 në vendkalimin kufitar në Merdarë dhe që atëherë është mbajtur në paraburgim.

Dënimi i Mehmetajt ka nxitur reagime në Kosovë, ndërsa nga Ministria e Punëve të Jashtme dhe Diasporës e Republikës së Kosovës thonë për Telegrafin, se për dënimin e shqiptuar nga autoritet serbe kanë njoftuar ambasadat e shteteve të QUINT-it.

“Ministria e Punëve të Jashtme dhe Diasporës e Republikës së Kosovës ka ndjekur nga afër procesin gjyqësor ndaj Nezir Mehmetaj, shtetas i Republikës së Kosovës, i arrestuar më 3 janar 2020 në Serbi dhe i akuzuar për kinse krime lufte të pretenduara gjatë luftës në Kosovë më 1999. Në seancën përfundimtare më 6 dhjetor 2024, në Gjykatën e Lartë për Krime të Luftës në Beograd, trupi gjykues dënoi Mehmetaj me gjashtë (6) vite burg, duke e shpallur fajtor për kinse veprën penale të rrëmbimit. Për këtë vendim janë njoftuar ambasadat e shteteve të Kuint-it në Serbi dhe në Kosovë”, kanë deklaruar nga MPJD.

Po ashtu, MPJD thekson se “ka alarmuar dhe njoftuar rregullisht institucionet e Bashkimit Evropian, shtetet e QUINT-it dhe organizatat ndërkombëtare për mbrojtjen e të drejtave të njeriut, duke ngritur shqetësime të vazhdueshme rreth veprimeve arbitrare dhe destruktive të Serbisë, të cilat bien ndesh me konventat ndërkombëtare për të drejtat e njeriut”.

Nga MPJD gjithashtu bëjnë të ditur se kanë vizituar Mehmetaj në burg, derisa bëjnë thirrje që ndërkombëtarët të ndërmarrin veprime ndaj Serbisë.

“Gjithashtu, përfaqësuesit e MPJD-së kanë vizituar rregullisht Mehmetaj në burg dhe kanë marrë pjesë në seancat gjyqësore ndaj tij, duke parë nga afër pretendimet e pabaza të Serbisë ndaj qytetarëve të Kosovës.

MPJD i bën thirrje Serbisë që të ndalë veprimet e saj arbitrare kundër qytetarëve të Kosovës dhe, njëkohësisht, kërkon nga bashkësia ndërkombëtare të ndërmarrë veprime të menjëhershme kundër këtyre veprimeve të vazhdueshme të Serbisë”.

Ndaj dënimit për Nezir Mehmetaj ka reaguar edhe kryetari i Kuvendit, Glauk Konjufca.

Konjufca derisa ka dënuar fuqishëm këtë padrejtësi, ka kërkuar nga bashkësia ndërkombëtare të rrisë presionin ndaj Serbisë.

“Sot, pas një arrestimi në vitin 2020, pas një akuzimi dhe procesi të shpikur e arbitrar ndaj qytetarit tonë Nezir Mehmetaj, gjykata në Serbi e ka dënuar atë me 6 vite burg. Mendësia e vjetër e Serbisë që ka kryer gjenocid në Kosovë nuk mund të prodhojë asgjë të re veçse fshehjes së krimeve në njërën anë dhe shpikjes së tyre në anën tjetër”, tha ai.

Ndërkaq, familja e Nezir Mehmetaj i ka hedhur poshtë akuzat kundër tij. /Telegrafi

© SYRI.net

Lexo edhe:

• Kurti s’deklarohet a do të bëjë marrëveshje, ‘komunikimet i fillon pas certifikimit të rezultateve’
• Hashim Thaçi i qeshur në imazhin e fundit të ndarë nga djali i tij
• Vazhdon trendi i rënies së çmimit të naftës në Kosovë