Përfundon invervistimi i Nagip Krasniqit nga Prokuroria Speciale, nuk deklarohet: Mos më shqetëso

Intervistimi i ish-kryeshefit të KEK-ut, Nagip Krasniqi nga Prokuroria Speciale e Kosovës tashmë ka përfunduar.

Ai nuk ka dashur të prononcohet për media pas intervisitmit.

Kur është pyetur nga gazetarja e Nacionales se për çka është intervistuar, Krasniqi ka kërkuar që të mos shqetësohet.

“Mos më shqetëso, a ka mundësi“.

Intervistimi i Krasniqit para prokurorëve të Speciales ka zgjatur më shumë se katër orë.

Në Prokurori ai ka hyrë në ora 13:00 dhe ka dalë pas orës 17.

Zëdhënësja e kësaj prokurorie, Liridona Kozmaqi, ka bërë me dije se Nagip Krasniqi është intervistuar në cilësinë e të pandehurit për një çështje penale.

“Lidhur me rastin për të cilin keni pyetur Ju informoj se N.K. është paraqitur sot në Prokurorinë Speciale me ftesë të kësaj prokurorie. I njëjti është intervistuar në cilësinë e të pandehurit për një çështje penale, të cilën kjo prokurori e ka në hetim”, ka thënë Kozmaqi.

Ndërsa Virtyt Ibrahimaga, avokat i kryeshefit të KEK-ut, Nagip Krasniqi, ka thënë se Krasniqi është intervistuar sot nga Prokuroria Speciale për “keqpërdorim të detyrës zyrtare”.

Avokati ka thënë se kjo nuk është çështje e re, por është intervista e dytë në lidhje me hetimet që janë duke u bërë për riparimin e Bllokut A5 që kanë filluar në janar të vitit 2023.

“Për keqpërdorimin e detyrës zyrtare që ka të bëjë me riparimin e Bllokut A5 që ka fillu hetimi në janar të vitit 2023. Kjo është intervista e dytë, nuk është çështje e re hetimore është e vjetër”, ka deklaruar ai para mediave.

Ndryshe Prokuroria muaj më parë ka ngritur aktakuzë në Gjykatën Themelore në Prishtinë kundër të pandehurit Nagip Krasniqi, ish-kryeshef ekzekutiv në Korporaten Energjetike të Kosovës (KEK).

“Prokuroria Speciale e Republikës së Kosovës, ka ngritur aktakuzë në Gjykatën Themelore në Prishtinë – Departamentin Special, kundër të pandehurit N.K. Sipas aktakuzës i pandehuri N.K.duke filluar nga data 15 tetor 2021 e në vazhdimësi deri me datë 19 prill 2023, në cilësinë e personit zyrtar, duke e shfrytëzuar detyrën zyrtare, kishte kryer veprën penale Keqpërdorimi i pozitës apo autoritetit zyrtare përcaktuar me nenin 414 par. 2 lidhur me nenin 77 të KPRK-së”, thuhet në njoftim.

Më 19 prill 2023, Prokuroria Speciale ka arrestuar kryeshefin ekzekutiv të KEK-ut, Nagip Krasniqi. Krasniqi sipas Prokurorisë, ishte arrestuar për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”.

Ndërkohë, më 25 prill 2024 Bordi i kompanisë publike të KEK-ut, ka pezulluar nga detyra e kryeshefit Nagip Krasniqin.

© SYRI.net

Lexo edhe:

• Hashim Thaçi i qeshur në imazhin e fundit të ndarë nga djali i tij
• Vazhdon trendi i rënies së çmimit të naftës në Kosovë
• Cakolli: Më shumë se gjysma e fushatës zhvillohet në rrjete sociale, partitë e raportojnë vetëm një ‘porcion’ të shpenzimeve