Sonte ndizen qirinjtë për 21-vjeçaren që u vra dje në Ferizaj

19:44, 13/04/2024

Sonte duke filluar nga ora 20:00 do të ndizen qirinjtë për 21-vjeçaren që u vra dje në Ferizaj.

Qirinjtë do të ndizen para objektit të Qendrës për Punë Sociale në Ferizaj, aty ku edhe është vrarë viktima.

“Sonte në orën 20:00 ndezim qirinjë para objektit të Qendrës për Punë Sociale në Ferizaj në kujtim të viktimës së radhës së FEMICIDIT, plagë kjo që po vazhdon të lëngojë në shoqërinë tonë. Të gjithë pa dallim gjinie, sonte jemi ERONA!”, thuhet në njoftim.

E.C., 21 vjeçare, u vra dje nga ish-bashkëshorti 36-vjeçar në Qendrën për Punë Sociale në Ferizaj.

Lexo më shumë: Vritet një grua në Qendrën për Punë Sociale në Ferizaj

I plagosur mbeti edhe vëllai i viktimës 15-vjeçar.

36-vjeçari V.A, ish-bashkëshorti i viktimës, u arrestua nga policia pasi fillimisht ishte larguar në drejtim të panjohur, pas ngjarjes.

Ndërsa sot, Gjykata Themelore në Ferizaj, lidhur me këtë rast ka caktuar masën e paraburgimit në afat prej një muaji ndaj të dyshuarit me iniciale V.A.

“Gjykata Themelore në Ferizaj – Departamenti i Krimeve të Rënda ka aprovuar kërkesën e Prokurorisë Themelore të Ferizajt-Departamenti i Krimeve të Rënda, për caktimin e masës së paraburgimit kundër të pandehurit V.A, për shkak të dyshimit të bazuar se ka kryer veprën penale vrasje e rëndë nga neni 173 par.1 nënpar 1.3 dhe 1.5 të Kodit Penal të Republikës së Kosovës dhe veprës penale mbajtja në pronësi, kontroll ose posedim të paautorizuar të armëve nga neni 366 par.1 të Kodit Penal të Republikës së Kosovës (KPRK)”, thuhet në njoftimin e gjykatës.

Lexo më shumë: Një muaj paraburgim ndaj të dyshuarit për vrasjen e 21-vjeçares në Ferizaj

Ai po akuzohet për dy vepra penale, “vrasje e rëndë” dhe “mbajtja në pronësi, kontroll ose posedim të paautorizuar të armëve”.

Gjykata ka thënë se i dyshuari e ka goditur viktimën disa herë në kokë brenda zyrës së Qendrës për Punë Sociale në Ferizaj.

“Ekziston dyshimi i bazuar, se me datë 12 Prill 2024, rreth orës 14:40, i pandehuri brenda zyrës së Qendrës për Punë Sociale në rr.”Vëllezërit Gërvalla”, në Ferizaj, me dashje ka privuar nga jeta të ndjerën E.C, me të cilën ka bashkëjetuar duke e goditur disa herë me armë plumba në kokë, ndërsa ka shtënë edhe në drejtim të miturit D.C (vëllai i të ndjerës) duke e plagosur në krahë”.

© SYRI.net

Lexo edhe:

• Grabiste bashkë me kriminelin famëkeq maqedonas, arrestohet shqiptari në Greqi
• “Gangsteri i Prishtinës”, kush është Enver Sekiraqa, i dënuar me 25 vjet burgim për nxitje të vrasjes së Triumf Rizës?
• Kryeprokurori Isufaj për rastin e Enver Sekiraqës: Ne kemi bërë punën tonë