“Dita Botërore pa duhan” – çdo i dyti person duhanpirës ka gjasa të vdesë nga sëmundjet kardiovaskulare dhe kanceri

14:47, 31/05/2022

Në Institutin Kombëtar të Shëndetësisë Publike, është shënuar Dita Botërore pa Duhan.

Sipas një njoftimi për media thuhet se qëllimi i shënimit të kësaj dite është rritja e ndërgjegjësimit të popullatës për rreziqet që mund të sjell përdorimi i duhanit.

“Gjithashtu, u tha se pirja e duhanit është shkaktari kryesor i sëmundjeve dhe vdekjeve të parakohshme, është shkaktari i dytë i vdekjeve në botë, ku çdo vit në botë vdesin rreth 8 milion njerëz, si pasojë e tymosjes së duhanit, numër ky që bazuar në trendin aktual, pritet të dyfishohet gjatë 20 vjetëve të ardhshme. Çdo 6.5 sekonda në botë vdes një njeri nga dëmet që sjell tymosja e duhanit”, thuhet në njoftim.

Duhanpirësit janë dy herë më të rrezikuar nga sulmi në tru, katër herë nga sëmundjet e zemrës se sa jo-duhanpirësit, 22 herë më shumë gjasa të zhvillojnë kancer të mushkërive sesa jo-duhanpirësit, rreth 25% të të gjitha vdekjeve nga kanceri globalisht shkaktohen nga përdorimi i duhanit.

Drejtori i Institutit Kombëtar, Naser Ramadani, tha se IKSHPK do të vazhdojë edhe më tutje të realizojë hulumtime si GYTS, STEPs dhe të tjera relevante, që të sigurojë evidencë mbi bazën e të cilave mund të ndërmerren intervenime dhe hartohen politika për ruajtjen dhe përparimin e shëndetit të popullatës, dhe kategorive vulnerabile të saj.

Ai tha se për këtë qëllim janë organizuar aktivitete të shumta, duke filluar nga aktivitetet nëpër shkolla, shpërndarjen e materialeve edukativo shëndetësore në qytete, porosi dhe këshilla për parandalimin e konsumimit të duhanit.

Zëvendësministre e Shëndetësisë, Dafina Gexha, tha se nga viti 2013 kur Kosova miratoi Ligjin për Kontrollin e Duhanit, i cili sipas saj, përveç se u vlerësua lart nga mekanizmat lokal dhe ndërkombëtar, gjithashtu dha dëshmi të qarta se kur ka një bashkëveprim të mirë të institucioneve, shoqërisë civile dhe vet qytetarëve, mund të bëhen ndryshime të pa imagjinueshme në fushën e shëndetit publik, duke mbrojtur përmes ligjit nga pasojat shkatërruese shëndetësore, sociale, ekonomike dhe mjedisore, të cilat janë edhe motoja e kësaj dite sivjet, që bën thirrje për mbrojtjen e planetit tonë nga helmimi me duhan.

 

“Disa vjet pas, ne shohim rënie të ndjeshme të disiplinës për zbatimin e Ligjit për Kontrollin e Duhanit, i cili pavarësisht shkeljeve që i bëhen ka sjellë një kulturë të re edukative në shoqërinë tonë, duke prodhuar efekte në uljen e konsumit në mesin e të rinjve, siç tregon edhe Hulumtimi gjithëpërfshirës i duhan-pirjes tek të rinjtë GYTS II, i cili gjeti se në mesin të rinisë të moshës 13-15 vjeç, konsumi i duhanit nga 6.7% sa ishte para hyrjes në fuqi të ligjit, kishte rënë në 4.4% më 2016, derisa duhan-pirja pasive ishte përgjysmuar, nga 84% në 43%. Prevalenca e duhan-pirjes në Kosovë mbetet ende e lartë me rreth 28%-30% të popullatës së rritur që konsumojnë duhan, ku burrat janë konsumues më të mëdhenj të këtij produkti, por që fatkeqësisht është vërejtur rritje e konsumimit edhe në mesin e gjinisë femërore, përfshirë këtu edhe shtatzëna”, tha mes tjerash ajo.

Arben Lila-Përfaqësues i organizatës KADC, theksoi rëndësinë e zbatimit të Ligjit për Kontrollin e Duhanit dhe theksoi se duhet pamundësuar që industria e duhanit të ketë ndikim mbi institucionet dhe të ndërhyjë në politikat e kontrollit të duhanit, siç ka bërë në disa nga qeveritë e kaluara, duke shtyrë miratimin e Udhëzimit për vërejtjet e kombinuara shëndetësore.

Ai gjithashtu, u shpreh se duhet të organizohen më shumë aktivitete, si: vendosja e fotografive në pakot e duhanit, të cilat sipas tij, në vitet paraprake, kanë treguar një rezultat shumë të mirë në lënien e duhanit.

Oleksandr Martynenko, nga Zyra e OBSh-së, Prishtinë tha se me rastin e shënimit të kësaj Dite, duhet të ndërgjegjësojmë popullatën se sipas tij, dëmi nga duhanpirja shkon përtej tymit të një cigareje.

Ai tha se duhani shkakton kancer, dhe se çdo i dyti person duhanpirës, ka gjasa të vdesë nga sëmundjet kardiovaskulare dhe kanceri.

“Nga fillimi në fund – nga paketimi, transporti, konsumi -Cikli jetësor i duhanit ndot, dëmton dhe përfundimisht na vret ne dhe planetin tonë”, tha ai. 

© SYRI.net

Lexo edhe:

• ‘Bllokohet’ anëtarësimi në KiE, Kurti: Mos na pyetni neve, pyetni ata çka s’paska plotësuar Kosova
• Bie kërkesa e aplikimit për dokumente, Agjencia e Regjistrimit Civil rikthen orarin e zakonshëm
• U shkarkua nga detyra/ Escobar mban konferencën e fundit për mediat