Gazsjellësin Keystone, Biden do ta anulojë që ditën e parë

10:36, 19/01/2021

Presidenti i zgjedhur amerikan Joe Biden do të anulojë gazsjellësin e diskutueshëm Keystone XL që në ditën e tij të parë në detyrë, shkruajnë mediat e Amerikës së Veriut.

Gazsjellësi parashikohet të transportojë naftë në 1,900 km që nga provinca kanadeze e Alberta deri në Nebraska, për t'u bashkuar me një tubacion ekzistues.

Ambientalistët dhe grupet e amerikanëve vendas e kanë kundërshtuar projektin për më shumë se një dekadë. Puna qe ndërprerë, por rifilloi në vitin 2019 nën Presidentin Donald Trump.

Z. Trump rrëzoi një vendim të paraardhësit të tij, Barack Obama, i cili vuri veton e një projektligji që miratonte ndërtimin në vitin 2015. Gazsjellësi i financuar privatisht pritet të kushtojë rreth 8 miliardë dollarë.

Çfarë planifikon të bëjë Biden?

Sipas mediave kanadeze dhe amerikane, z. Biden do të nënshkruajë një urdhër ekzekutiv që revokon lejen për ndërtimin e gazsjellësit Keystone XL që në Ditën e Përurimit, më 20 janar. Ai gjithashtu do të kthejë SHBA-në në Marrëveshjen për Klimën të Parisit - një pakt global për ndërprerjen e emetimeve të karbonit - duke përmbysur një vendim tjetër nga z. Trump, i cili nxori SHBA nga marrëveshja në 4 nëntor të vitit të kaluar.

 Z. Biden është zotuar ta bëjë luftën kundër ndryshimit të klimës një përparësi kryesore të administratës së tij. Udhëheqësi i Albertës, Kryeministri Jason Kenney, tha se ai ishte "thellësisht i shqetësuar" nga raportimet për planet e z. Biden dhe tha nëse tubacioni anulohej, qeveria e tij do të shikonte veprimet ligjore.

Gazsjellësi Keystone XL do të transportonte rreth 830,000 fuçi nafte bruto në ditë nga fushat në Alberta për në Nebraska. Nga atje, nafta do të udhëtonte përmes tubacioneve ekzistuese për të arritur rafineritë përreth Gjirit të Meksikës. Tubacioni do të transportonte një vaj të nxjerrë nga fushat në Alberta, një përzierje rëre, uji, argjile të quajtur bitum.

Grupet mjedisore si Greenpeace thonë se sasia e gazrave serë të emetuar për fuçi mund të jetë 30% më e lartë dhe grupet autoktone në Alberta kanë paditur qeveritë provinciale dhe federale për dëmet, duke thënë se shkeleshin të drejtat e tyre të garantuara për të gjuajtur dhe peshkuar në tokat e veta.

© SYRI.net

Lexo edhe:

• Strazimiri: Ndërkombëtarët faktuan se Basha është një mashtrues, reforma zgjedhore do të bëhet me konsensus
• Vizita e Klinton/ Ngjela: Kisha ftesë po nuk vajta se kisha frikë se më lënë në këmbë
• VIDEO/ Nador Bakalli: Pa votën e diasporës kjo mazhorancë nuk shkulet