Arabia Saudite shkaktoi një nga surprizat e para të Botërorit 2026, duke ndalur Uruguain në barazim 1-1 në ndeshjen e Grupit H të zhvilluar në Miami.

Uruguai i drejtuar nga Marcelo Bielsa zhvilloi një paraqitje nën pritshmëri në pjesën e parë, duke u shfaqur i ngathët dhe pa ritmin e zakonshëm. Arabia Saudite përfitoi nga kjo situatë dhe kaloi në avantazh në minutën e 41-të, kur mbrojtësi Abdulelah Al Amri realizoi golin që befasoi amerikano-latinët.

Pas pushimit, uruguaianët rritën presionin dhe kërkuan me ngulm golin e barazimit. Sulmet e njëpasnjëshme të “La Celestes” vunë në vështirësi mbrojtjen saudite, e cila rezistoi për një kohë të gjatë.

Megjithatë, këmbëngulja e Uruguait u shpërblye në minutën e 80-të. Maxi Araujo gjeti rrugën e rrjetës dhe riktheu ekuilibrat në rezultat, duke shmangur humbjen e ekipit të tij në ndeshjen e parë të turneut.

Në fund, sfida u mbyll me rezultatin 1-1, një rezultat që mund të konsiderohet zhgënjyes për Uruguain, ndërsa Arabia Saudite feston një pikë të rëndësishme ndaj një kundërshtari shumë më të favorizuar.