Komiteti i Pavarur Disiplinor i FIFA-s ka mbyllur hetimin ndaj arbitrit australian Shaun Evans, duke konfirmuar se nuk ka gjetur asnjë provë për shkelje të Kodit Disiplinor të organizatës.

Rasti kishte të bënte me një gjest të bërë nga Evans në dhomën e VAR-it para ndeshjes mes Gjermanisë dhe Curaçaos në Botërorin 2026. Në rrjetet sociale dhe në disa media, lëvizja e dorës së arbitrit u interpretua si simboli i njohur “OK i përmbysur”, i cili në disa raste është lidhur me grupime supremaciste të bardha.

Pas shqyrtimit të materialeve dhe deklaratës së vetë arbitrit, FIFA vendosi se nuk ekzistojnë prova që tregojnë se gjesti ishte i qëllimshëm ose përbënte shkelje disiplinore.

Edhe vetë Evans reagoi publikisht, duke mohuar kategorikisht çdo mesazh apo simbolikë të fshehur pas lëvizjes së tij.

“Dua të sqaroj se nuk kam bërë qëllimisht asnjë gjest apo simbol me dorë për të përcjellë ndonjë mesazh, përkatësi, lojë apo bindje të çfarëdo lloji. Shpjegimi i vetëm që mund të jap është se ka qenë një tik i pavullnetshëm dhe i pavetëdijshëm, dhe nuk e kuptova në atë moment se po e bëja”, deklaroi arbitri australian.

Ai shtoi se pamjet e regjistruara më vonë gjatë ndeshjes tregojnë se e kishte përsëritur të njëjtën lëvizje disa herë teksa mbante një stilolaps mes gishtave.

Evans u shpreh gjithashtu i zhgënjyer nga interpretimet që pasuan incidentin. “Mbulesa mediatike pas këtij episodi nuk pasqyron aspak se kush jam. E kuptoj se si është interpretuar gjesti dhe më vjen keq për këtë, por dua të jem shumë i qartë: nuk e kam bërë me vetëdije apo qëllimisht simbolin në fjalë”, theksoi ai.

Në përfundim, arbitri australian nënvizoi se pjesëmarrja në Botëror përfaqëson kulmin e karrierës së tij dhe se mezi pret të vazhdojë të mbështesë kolegët e tij gjatë pjesës së mbetur të turneut.