Vllaznia ka zyrtarizuar ndarjen me dy futbollistë të ekipit, në një periudhë kur klubi po bën ndryshime në organikë për sezonin e ri.

Klubi shkodran kishte aktivizuar më herët klauzolat e rinovimit me disa prej lojtarëve të tij, por në të njëjtën kohë ka ardhur edhe momenti i largimeve për ata futbollistë që nuk kanë pranuar të vazhdojnë bashkëpunimin.

Dy emrat e parë që janë konfirmuar zyrtarisht si të larguar janë mbrojtësit Andrej Jago dhe Alexandros Kouros.

Në njoftimin zyrtar, Vllaznia bëri të ditur mbylljen e bashkëpunimit me të dy lojtarët, duke i falënderuar për kontributin e dhënë me fanellën kuqeblu dhe duke u uruar suksese në të ardhmen.

Largimi i Jagos ishte në fakt i pritshëm, pasi ai kishte pasur edhe një përplasje me trajnerin Edi Martini gjatë ndeshjes së fundit ndaj Elbasani, çka kishte tensionuar situatën e tij brenda skuadrës.

Nga ana tjetër, Kouros ishte një afrim i kërkuar nga vetë Martini në verën e kaluar, por nuk arriti të përshtatej me pritshmëritë, duke mbetur shpesh në rolin e alternativës nga stoli dhe duke mos e bindur plotësisht stafin teknik.

Kështu, Vllaznia vazhdon riorganizimin e skuadrës për sezonin e ardhshëm, me synimin për të forcuar grupin dhe për të rritur konkurrueshmërinë në kampionat.