Mesfushori i Shqipërisë, Kristjan Asllani, analizoi humbjen 0-1 ndaj Izraeli në miqësoren e zhvilluar në ‘Air Albania’. Futbollisti kuqezi foli për nisjen e bashkëpunimit me trajnerin e ri, si edhe për situatën e tij në nivel klubesh.

Asllani u shpreh se skuadra po përshtatet mirë me idetë e trajnerit Maran dhe se grupi ka reaguar pozitivisht në seancat stërvitore dhe në fushë.

“Fillimi me trajnerin e ri ka qenë shumë pozitiv. Është një njeri shumë i mirë dhe po mundohemi të zbatojmë idetë e tij. Gjatë ndeshjes provuam të bënim presing të lartë, ndërsa në pjesën e dytë punuam më shumë në situatat një kundër një. Fatkeqësisht pësuam gol, por zgjedhjet dhe mënyra e lojës i takojnë trajnerit”, deklaroi mesfushori shqiptar.

Më tej, Asllani theksoi se grupi është në gjendje të mirë dhe i përgatitur për sfidat e ardhshme.

“Të gjithë lojtarët janë gati dhe ekipi është stërvitur shumë mirë. Tani duhet të shohim përpara dhe të përgatitemi për ndeshjen e radhës”, u shpreh ai.

Në fund, futbollisti foli edhe për të ardhmen e tij në klub, duke lënë të kuptohet se dëshira e tij është të vazhdojë te Beşiktaş.

“Për momentin nuk di shumë për të ardhmen. Besiktasi ka të drejtën e blerjes së kartonit tim dhe unë jam ndier shumë mirë aty. Shpresoj të qëndroj”, përfundoi Asllani.