Charles Leclerc do të vazhdojë të jetë pilot i Ferrarit edhe për shumë vite të tjera. Skuderia nga Maranello ka zyrtarizuar rinovimin shumëvjeçar të kontratës me pilotin francez, duke konfirmuar edhe një herë besimin e plotë ndaj njërit prej emrave më të rëndësishëm të Formula 1.

Në komunikatën zyrtare, Ferrari theksoi se Leclerc do të vazhdojë të mbrojë ngjyrat e ekipit në sezonet e ardhshme të Kampionatit Botëror të Formulës 1. “Charles është pjesë e familjes Ferrari prej shumë vitesh dhe ky rinovim na duket diçka krejtësisht natyrale”, shkruhet në deklaratën e skuderisë italiane.

Lidhja mes Leclerc-ut dhe Ferrarit nisi shumë kohë përpara debutimit të tij në Formula 1. Ai iu bashkua akademisë së pilotëve të Ferrarit në vitin 2016, fitoi titullin në Formula 2 në vitin 2017 dhe një vit më vonë debutoi në Formula 1. Në vitin 2019 u bë pjesë e skuadrës kryesore të Ferrarit dhe prej atëherë është kthyer në një figurë qendrore të ekipit.

Piloti 28-vjeçar ka dhuruar fitore të rëndësishme, ‘pole position’ dhe podiume të shumta për tifozët e Ferrarit. Aktualisht ai është piloti i dytë në historinë e Ferrarit me më shumë gara në Formula 1 dhe gjithashtu renditet i dyti për numrin e ‘pole position’, vetëm pas legjendës Michael Schumacher.

Pas zyrtarizimit të rinovimit, Leclerc nuk e fshehu emocionin e tij.

“Jam shumë i lumtur që do të vazhdoj këtë rrugëtim me Ferrari. Për mua kjo skuadër ka qenë gjithmonë më shumë sesa një ekip garash. Është ekipi që kam dashur që fëmijë dhe tani është bërë si familja ime e dytë”, deklaroi Leclerc.

Ai shtoi se objektivi i tij mbetet rikthimi i titullit botëror në Maranello.

“Besoj te kjo skuadër më shumë se kurrë dhe do të vazhdoj të jap maksimumin për ta rikthyer Ferrarin aty ku e meriton, në majën e Formula 1”, u shpreh Leclerc.

Edhe Ferrari vlerësoi jo vetëm talentin e pilotit, por edhe karakterin dhe lidhjen e tij me ekipin.

“Charles është rritur shumë gjatë këtyre viteve. Ai nuk është vetëm një nga pilotët më të fortë në Formula 1, por edhe një person që përfaqëson në mënyrë perfekte vlerat e Ferrarit”, theksoi skuderia italiane.