Arne Slot i ka dhënë fund aventurës së tij te Liverpooli me një mesazh emocional drejtuar tifozëve, lojtarëve dhe gjithë klubit. Trajneri holandez largohet nga “Anfield” pas dy sezonesh, ku arriti të fitonte edhe titullin e Premier League.

Në letrën e tij të hapur, Slot theksoi se marrëdhënia që krijoi me Liverpoolin dhe tifozët nuk lidhej vetëm me futbollin.

“Lidhja që ndajmë shkon përtej futbollit, përtej netëve evropiane nën dritat e Anfield ose tingullit të këngës ‘You’ll Never Walk Alone’ që këndohet nga ‘The Kop’. Më bëtë të ndihem i mirëpritur që nga fillimi dhe më ndihmuat në këtë rrugë. Kjo është diçka që e vlerësoj shumë”, shkroi trajneri holandez.

Slot u ndal edhe te suksesi në Premier League, duke pranuar se triumfi kishte një domethënie të veçantë për shkak të atmosferës së krijuar nga tifozët.

“Pata privilegjin të dëshmoja nga afër frymën tuaj të dhembshurisë dhe unitetit”, deklaroi ai.

Holandezi vlerësoi gjithashtu forcën dhe solidaritetin që karakterizon qytetin e Liverpoolit, duke nënvizuar se kjo frymë ka ndihmuar komunitetin të përballojë momentet më të vështira ndër vite.

“Është një frymë që e ka çuar këtë qytet në momente të vështira më parë dhe një që shpresoj se do të ndihmojë në sjelljen e drejtësisë dhe llogaridhënies për të cilën kaq shumë njerëz kanë bërë fushatë gjatë shumë viteve”, shtoi Slot.

Në fund të mesazhit, ai falënderoi lojtarët, stafin dhe drejtuesit e klubit për bashkëpunimin gjatë këtyre viteve.

“Ka qenë një kënaqësi të punoj me ju të gjithë. Titulli i 20-të i ligës së Liverpoolit na përket të gjithëve dhe do të mbetet një kapitull i rëndësishëm në historinë e tij. Për këtë të gjithë duhet të jemi krenarë”, u shpreh ai.

Slot u largua me optimizëm për të ardhmen e klubit, duke besuar se brezi i ri i lojtarëve do të vazhdojë traditën dhe sukseset e Liverpoolit.

“Në të njëjtën kohë, po del një brez i ri, gati për të shkruar historinë e vet dhe për të përqafuar përgjegjësinë që vjen me veshjen e kësaj fanele. Ndryshimi është pjesë e futbollit, por e di që ky klub do të vazhdojë t’i bëjë njerëzit e tij krenarë”, përfundoi trajneri holandez.