Hansi Flick ka deklaruar se nuk e sheh veten të qëndrojë një dekadë në stolin e Barcelonës, siç ka bërë Pep Guardiola te Manchester City.

Trajneri gjerman foli në konferencën e fundit për shtypin të sezonit në Ciutat Esportiva, në prag të ndeshjes Valencia–Barcelona, e cila mbyll një kampionat që tashmë është fituar. Ai theksoi se skuadra ka ende uri për trofe dhe synimi kryesor mbetet Liga e Kampionëve.

“Ne duam të fitojmë, është e rëndësishme ta mbyllim sezonin me fitore. Kemi ende shumë për të dhënë”, u shpreh Flick. Ai shtoi se ekipi synon fitimin e tri kampionateve radhazi, duke thënë: “Jam 100% i motivuar, do të japim gjithçka për ta arritur”.

Flick vlerësoi gjithashtu sezonin e skuadrës dhe theksoi se projekti i klubit po ecën në drejtimin e duhur: “Kemi fituar pesë trofe, por duam më shumë. Ëndrra jonë është Liga e Kampionëve”.

I pyetur për mundësinë e një qëndrimi afatgjatë si Guardiola te City, ai u tregua i prerë: “Nuk mendoj. Do të isha 70 vjeç, nuk është e mundur të qëndroj kaq gjatë. Pep është i jashtëzakonshëm, më i miri në botë, 10 vite në atë nivel është diçka e rrallë”.

Flick, i cili është i rinovuar deri në vitin 2028, shtoi se është plotësisht i përqendruar te puna aktuale dhe te objektivat e klubit. Ai gjithashtu shmangu komentet për debatet rreth Real Madridit, duke theksuar se fokusi i tij është vetëm te skuadra katalanase.

Në fund, trajneri gjerman u shpreh i kënaqur me progresin e ekipit dhe falënderoi klubin për mbështetjen gjatë sezonit, duke theksuar rëndësinë e respektit dhe unitetit brenda grupit.