Manchester United mori një fitore të rëndësishme 2-1 ndaj Brentford-it në “Old Trafford”, duke u afruar shumë me sigurimin e një vendi në UEFA Champions League për sezonin e ardhshëm. Ndeshja ishte e hapur, me raste të shumta dhe ritëm të lartë nga fillimi deri në fund.

Fillimi i takimit ishte i zjarrtë, me Kobbie Mainoo që depërtoi bukur mes mbrojtjes së Brentfordit dhe shërbeu për Amad Diallo, por goditja e këtij të fundit u ndal në vijë nga Sepp van den Berg. Pak më vonë, Harry Maguire provoi me kokë, por portieri Caoimhín Kelleher reagoi në momentin e fundit për të shmangur golin.

Megjithatë, presioni i vendasve u shpërblye shpejt. Casemiro zhbllokoi rezultatin në minutën e 11-të, duke shënuar me kokë pas një krosimi të Bruno Fernandes. Mesfushori brazilian vazhdoi të ishte i rrezikshëm, ndërsa Brentford humbi disa raste të pastra me Igor Thiagon.

Pak para pushimit, Manchester United dyfishoi avantazhin. Benjamin Šeško shënoi një gol të bukur pas një asistimi tjetër të Bruno Fernandes, duke e mbyllur pjesën e parë 2-0 dhe duke i dhënë qetësi skuadrës vendase.

Në pjesën e dytë, Brentford u përpoq të rikthehej në lojë dhe krijoi disa raste të rrezikshme, përfshirë goditje në shtyllë nga Dango Ouattara. Megjithatë, goli i vetëm për miqtë erdhi në minutën e 87-të nga Mathias Jensen, duke e kthyer ndeshjen në tension deri në fund.

Pavarësisht presionit të fundit, United e ruajti avantazhin dhe mori tri pikë të vlefshme. Me këtë fitore, skuadra vazhdon serinë pozitive në kampionat dhe mbetet shumë pranë sigurimit të kualifikimit në Champions League, ndërsa Brentford vazhdon të luftojë për një vend historik në garat evropiane.