Cagliari është rikthyer te fitorja në javën e 34-t të Serisë A, duke mposhtur 3-2 Atalanta në një ndeshje spektakolare në “Unipol Domus”.

Sfida nisi në mënyrë të furishme për vendasit, teksa talenti i ditëlindjes 2007, Paul Mendy, shënoi që në sekondat e para të ndeshjes, duke shfrytëzuar një gabim të rëndë në mbrojtjen bergamaske. I njëjti lojtar realizoi edhe golin e dytë në minutën e 8-të, duke kompletuar një ‘dopietë’ të jashtëzakonshme dhe duke vendosur ndeshjen në shinat e duhura për Cagliari-n.

Megjithatë, reagimi i Atalantës nuk mungoi. Gianluca Scamacca shënoi dy herë brenda pak minutash në fundin e pjesës së parë, duke barazuar rezultatin në 2-2 dhe rikthyer shpresat për skuadrën e tij.

Në pjesën e dytë, protagonist u bë Gennaro Borrelli, i cili hyri nga stoli dhe shënoi menjëherë golin e tretë për vendasit, që rezultoi vendimtar për fitoren. Ndeshja u karakterizua edhe nga raste të shumta, me portierin Caprile që shpëtoi disa herë Cagliari-n nga barazimi.

Me këtë sukses, Cagliari ngjitet në kuotën e 36 pikëve, duke bërë një hap të rëndësishëm drejt mbijetesës, ndërsa diferenca me zonën e rrezikut shkon në +8, katër javë nga fundi. Nga ana tjetër, Atalanta mbetet në 54 pikë dhe vazhdon momentin negativ, duke u larguar edhe më shumë nga objektivi për një vend në Europë.