Real Madridi ka konfirmuar zyrtarisht gjendjen fizike të Kylian Mbappé-së, pas dëmtimit që e detyroi të largohej nga fusha në fundin e ndeshjes ndaj Real Betisit.

Sipas raportit mjekësor të publikuar këtë të hënë, sulmuesi francez ka pësuar një dëmtim në muskulin e këmbës së majtë dhe mbetet në vëzhgim për evoluimin e gjendjes. Lajmi konsiderohet lehtësues për madrilenët, pasi fillimisht kishte shqetësime për një dëmtim më të rëndë për golashënuesin kryesor të skuadrës.

Është konfirmuar se Mbappé do të mungojë në ndeshjen e radhës së kampionatit kundër Espanyolit, një sfidë ku Barcelona mund të sigurojë matematikisht titullin në La Liga.

Megjithatë, objektivi kryesor i stafit mjekësor dhe teknik të Realit mbetet rikuperimi i tij për përballjen vendimtare ndaj Barcelonës në “El Clásico”, që do të zhvillohet më 10 maj, në ‘Camp Nou’. Afati prej rreth dy javësh jep shpresa reale që Mbappé të jetë gati për këtë sfidë shumë të rëndësishme.

Në kampin madrilen mbizotëron një optimizëm i kujdesshëm, ndërsa gjithçka do të varet nga reagimi i lojtarit ndaj trajtimit në ditët në vijim. Rikthimi i tij në kohë për ‘El Clásico’ mund të jetë vendimtar për ambiciet e fundit të sezonit për Real Madridin.