Një situatë e papritur ka shpërthyer në futbollin spanjoll, pasi LaLiga ka prezantuar një protokoll të ri kundër dhunës dhe diskriminimit, ndërsa Real Madridi ka reaguar duke e kundërshtuar atë në rrugë ligjore.

Më 26 mars, LaLiga zyrtarizoi për herë të parë një paketë masash për të parandaluar dhe për të ndërhyrë në rastet e racizmit, abuzimeve apo dhunës në stadiumet e futbollit profesionist. Presidenti Javier Tebas theksoi se kjo nismë synon të rrisë sigurinë dhe mirëqenien në kampionat, duke pasur edhe mbështetjen e ministrit të Brendshëm, Fernando Grande-Marlaska.

Ky i fundit nënvizoi se autoritetet po punojnë për të përforcuar ligjin ekzistues që nga viti 2007, me qëllim luftimin më të ashpër të grupeve ultras dhe fenomeneve të intolerancës përreth stadiumeve. Protokolli u prezantua në stadiumin e Atlético Madrid, me presidentin Enrique Cerezo që theksoi se futbolli duhet të zhvillohet në një ambient tolerance dhe sigurie, pa asnjë vend për dhunë apo ngacmime.

Megjithatë, pavarësisht mbështetjes së gjerë nga klubet e tjera, Real Madridi ka paraqitur një ankesë për anulimin e këtij vendimi, duke kundërshtuar karakterin detyrues të protokollit. Klubi i drejtuar nga Florentino Pérez argumenton se masat duhej të ishin vullnetare dhe jo të imponuara nga liga.

“Los Blancos” kërkuan edhe masa urgjente pezullimi, por gjykata i refuzoi ato, duke vendosur që fillimisht të dëgjojë argumentet e LaLiga-s. Ky qëndrim ka habitur shumë klube të tjera, të cilat e shohin si të pakuptimtë kundërshtimin ndaj një iniciative që synon të luftojë dhunën dhe diskriminimin.

Sipas analistëve, kjo përplasje mund të ndikojë edhe në imazhin e klubit madrilen, veçanërisht duke qenë se vetë Reali ka tashmë një protokoll të brendshëm për çështje të tilla, çka e bën debatin edhe më kompleks.