Trajneri Frank Lampard ka reaguar ndaj spekulimeve për një rikthim të mundshëm te Chelsea, duke theksuar se fokusi i tij mbetet te Coventry City.

Pas një sezoni të jashtëzakonshëm, Lampard arriti të udhëheqë Coventryn drejt titullit në Championship, duke siguruar rikthimin në Premier League pas 25 vitesh mungesë.

Ndërkohë, situata te Chelsea është bërë e paqëndrueshme pas shkarkimit të Liam Rosenior, vetëm pak orë pas humbjes së rëndë ndaj Brighton & Hove Albion.

Kjo ka rikthyer menjëherë zërat për një rikthim të Lampard në “Stamford Bridge”.

Megjithatë, ish-mesfushori legjendar i Chelseat ka qenë i rezervuar në deklaratat e tij.

Ai refuzoi të komentojë drejtpërdrejt për situatën në klubin londinez, duke e konsideruar si mungesë respekti ndaj trajnerëve të tjerë.

“Chelsea është pjesë e madhe e jetës sime, por aktualisht është puna e tyre dhe puna ime është këtu”, u shpreh ai.

Lampard theksoi se në futbollin modern, trajnerët janë gjithmonë nën presion dhe rezultatet sjellin pasoja të menjëhershme.

Ai shtoi se skuadra londineze ende ka mundësi të shpëtojë sezonin, veçanërisht në FA Cup.

I pyetur për shqetësimet e tifozëve të Coventryt, ai u shpreh se fokusi duhet të jetë te suksesi i arritur këtë sezon.

Sipas tij, ky është një moment për t’u shijuar dhe jo për t’u errësuar nga thashethemet.

“Ka qenë një sezon i jashtëzakonshëm dhe jam krenar që jam pjesë e tij”, theksoi Lampard.

Për momentin, e ardhmja e tij mbetet e hapur, por një gjë është e qartë: prioriteti i tij është të përfundojë misionin me Coventryn në mënyrën më të mirë të mundshme.