Situata te Milani mbetet e paqartë, ndërsa drejtuesit po përgatisin një verë me lëvizje të shumta në merkato.

Deri tani, pak pika duken të sigurta në formacionin kuqezi.

Në portë konfirmohet Mike Maignan, ndërsa në mbrojtje besohet te dyshja Matteo Gabbia dhe Strahinja Pavlović.

Në mesfushë, gjithçka lidhet me vendimin e Luka Modrić për të qëndruar, ndërsa Adrien Rabiot konsiderohet pjesë e projektit të ri.

Takimet mes trajnerit Massimiliano Allegri, drejtorit sportiv Igli Tare dhe CEO-s Giorgio Furlani kanë nxjerrë në pah dilema të mëdha për repartin ofensiv.

Rafael Leão nuk konsiderohet më i paprekshëm dhe mund të largohet nëse mbërrijnë oferta të rëndësishme.

Ndërkohë, situata e Christian Pulisic është edhe më e ndërlikuar.

Forma e dobët, me 17 ndeshje pa gol, dhe rinovimi i bllokuar pavarësisht kontratës deri në vitin 2027 kanë ngritur pikëpyetje serioze.

Interesimi nga klubet e Premier League mbetet konkret dhe po ndiqet nga afër.

Allegri kërkon të paktën tre përforcime të rëndësishme dhe nuk përjashtohet një ndryshim i skemës së lojës.

Në këtë kontekst, roli i Leaos dhe Pulisic vihet në diskutim, pasi nuk përshtaten plotësisht me idetë e reja taktike.

Merkatoja e verës pritet të jetë vendimtare për të ardhmen e Milanit, ku largimet e mundshme mund të hapin rrugë për një revolucion të vërtetë në skuadër.