Me vetëm dy muaj e gjysmë deri në përfundimin e kontratës së tij, e ardhmja e Manuel Neuer te Bayerni i Mynihut mbetet ende e paqartë.

Portieri veteran, një nga figurat më të rëndësishme të klubit bavarez ndër vite, nuk ka vendosur ende nëse do të vazhdojë karrierën apo do të tërhiqet nga futbolli aktiv.

Pavarësisht një gabimi në ndeshjen e fundit, Bayerni arriti një fitore spektakolare 4-3 ndaj Real Madridit, duke siguruar kualifikimin në gjysmëfinalet e Ligës së Kampionëve. Performanca e ekipit konfirmoi edhe një herë potencialin e skuadrës, ndërsa vëmendja u zhvendos menjëherë te situata e portierit.

Drejtori sportiv Maks Eberl sqaroi se aktualisht nuk ka asnjë ofertë konkrete për rinovimin e kontratës së Neuer. Megjithatë, ai la të hapur mundësinë që portieri të qëndrojë edhe një sezon tjetër, duke theksuar rëndësinë e formës fizike dhe gatishmërisë së tij mendore.

Nga ana tjetër, vetë Neuer u shpreh se ende nuk ka marrë një vendim përfundimtar.

Ai pranoi se një vendim do të vijë së shpejti, çka do të pasohet me bisedime të drejtpërdrejta me klubin.

Edhe drejtori tjetër sportiv, Kristof Freund, mbajti një qëndrim të qetë, duke theksuar se klubi është në një pozitë të mirë dhe se dera mbetet e hapur për vazhdimin e bashkëpunimit me portierin gjerman.

Në fund, gjithçka duket se varet nga vetë Neuer. Bayerni pret sinjalin e tij, ndërsa tifozët shpresojnë që lideri i portës të vazhdojë të jetë pjesë e skuadrës edhe për një tjetër sezon.