A e mbani mend ish-lojtarin e Romës, Max Tonetto? Sot, ish-mbrojtësi i njohur ka zgjedhur një rrugë krejt ndryshe në jetë, duke punuar si shofer Uber.

Tonetto, i cili ka luajtur edhe për skuadra si Sampdoria, Lecce, Bologna dhe Milani, si dhe ka qenë pjesë e skuadrës së drejtuar nga Luciano Spalletti, ka vendosur të investojë në një biznes të ri pas përfundimit të karrierës.

Ndryshe nga shumë ish-futbollistë që detyrohen të ndryshojnë jetë për arsye financiare, zgjedhja e tij nuk ka lidhje me vështirësi ekonomike. Sipas mediave italiane, ai ka investuar në një kompani transporti me shoferë dhe vetë është bërë pjesë aktive e saj, duke drejtuar automjet përmes platformës Uber.

Profili i tij në rrjet është bërë viral, me qindra udhëtime të realizuara, ndërsa shumë pasagjerë mbeten të surprizuar kur kuptojnë se në timon ndodhet një ish-lojtar që ka luajtur në nivelet më të larta të futbollit evropian, përfshirë edhe Ligën e Kampionëve.

Për Tonetton, kjo është një mënyrë për të qëndruar aktiv dhe për të zhvilluar investimin e tij, duke e kthyer një biznes në një përvojë personale. Mes kilometrave të shumta dhe udhëtimeve të përditshme, ai vazhdon të mbajë gjallë pasionin për jetën, duke ndarë histori dhe kujtime nga karriera e tij me klientët që rastisin ta kenë shofer.