E ardhmja e Ernest Muçi te Trabzonspori pritet të vendoset brenda 18 ditëve të ardhshme, teksa afrohet afati i fundit për aktivizimin e opsionit të blerjes së përhershme.

Mesfushori ofensiv shqiptar, i transferuar në huazim nga Beşiktaş, ka zhvilluar një sezon shumë të mirë me fanellën e Trabzonsporit, duke u shndërruar në një nga lojtarët më të rëndësishëm të skuadrës.

Në 35 ndeshje zyrtare, Muçi ka realizuar 13 gola dhe ka dhënë 8 asistime, duke pasur një ndikim të drejtpërdrejtë në rezultatet e skuadrës dhe në formën e saj përgjatë sezonit.

Sipas marrëveshjes mes dy klubeve, opsioni i blerjes prej 8.5 milionë eurosh skadon më 10 maj 2026, çka i jep Trabzonsporit pak më shumë se dy javë kohë për të marrë një vendim përfundimtar.

Presidenti i Beşiktaş-it, Serdal Adalı, ka konfirmuar se klubi turk do të respektojë çdo vendim të marrë nga Trabzonspori, ndërsa ka theksuar vlerën e lojtarit në treg.

Nga ana tjetër, presidenti i Trabzonsporit, Ertuğrul Doğan, po synon të ulë koston e transferimit, duke negociuar një marrëveshje në vlerën 6 deri në 6.5 milionë euro, duke marrë parasysh edhe pagesën e mëparshme të huazimit.

Klubi turk mund të ulet në tryezën e bisedimeve me Beşiktaşin për të arritur një marrëveshje më të favorshme, duke përfshirë edhe lehtësira në pagesë.

Performanca e Muçit dhe vendimi për të ardhmen e tij pritet të jenë një nga temat më të nxehta të merkatos në Turqi gjatë ditëve në vijim, ndërsa gjithçka do të vendoset brenda një afati shumë të shkurtër.