Strahinja Pavlovic po kalon një moment të artë te Milani, duke u shndërruar në një nga shtyllat kryesore të mbrojtjes më solide në Serie A. Në një intervistë për Sportmediaset, mbrojtësi serb ka dhënë një mesazh të qartë për të ardhmen e tij: ai dëshiron të qëndrojë gjatë dhe të fitojë me fanellën kuqezi.

“Dua të qëndroj këtu dhe të fitoj me Milanin”, deklaroi Pavlovic, duke theksuar se ndihet shumë i lumtur në qytet dhe në ambientin e klubit. Ai vlerësoi edhe mbështetjen e tifozëve, duke nënvizuar rëndësinë e unitetit mes skuadrës dhe publikut.

Në fjalët e tij nuk mungoi as një “ftesë” për bashkëkombësin Dusan Vlahovic, që shpesh është lidhur me një kalim të mundshëm te Milani. “Flas shpesh me të, është numri 1 kur është në formë. Do të ishte bukur të luanim bashkë”, u shpreh Pavlovic, duke lënë të hapur mundësinë e një bashkimi në të ardhmen.

Mbrojtësi serb vlerësoi edhe punën e trajnerit Massimiliano Allegri, duke theksuar se ka përmirësuar ndjeshëm aspektin mbrojtës dhe taktik nën drejtimin e tij. “Ai është shumë i rëndësishëm për ekipin, këtë sezon kemi bërë hapa përpara dhe mund të përmirësohemi edhe më shumë”, shtoi ai.

Pavlovic, i cili së fundmi është bërë edhe baba, po jeton një periudhë të veçantë si në fushë ashtu edhe jashtë saj. Me Milanin pranë kualifikimit në Champions, ambicia e tij mbetet e qartë: të vazhdojë të rritet dhe të arrijë suksese të mëdha me kuqezinjtë.