Sezoni i parë si trajner i Interit po rezulton i jashtëzakonshëm për Cristian Chivu, i cili tashmë ka një objektiv të qartë: ‘dopietën’, kampionat dhe Coppa Italia. Një arritje që, nëse realizohet, do ta vendoste menjëherë në histori, duke tejkaluar edhe emra të mëdhenj që kanë drejtuar zikaltrit.

As José Mourinho nuk arriti të fitonte kampionatin dhe Kupën e Italisë në sezonin e tij të parë, ndërsa Antonio Conte dhe Simone Inzaghi e fituan titullin respektivisht në vitin e dytë dhe të tretë. Chivu, ndërkohë, është vetëm pak hapa larg një suksesi të dyfishtë që do të kishte peshë të jashtëzakonshme.

Fillimi i sezonit nuk ishte i lehtë. Zgjedhja e tij u vu në dyshim dhe shumë tifozë kërkonin rikthimin e Mourinho-s. Megjithatë, me durim dhe punë të përditshme, trajneri rumun arriti të ndërtonte një skuadër të fortë, që me kalimin e javëve fitoi besim dhe stabilitet. Sot, Interi ndodhet pranë titullit dhe vetëm 90 minuta larg triumfit në Kupë.

Një nga transformimet më të dukshme është aftësia për përmbysje. Në fillim të sezonit, disavantazhi ishte pothuajse fatal për zikaltrit, por ndeshjet ndaj Como-s ndryshuan gjithçka: nga 0-2 në 4-2 në kampionat dhe nga 0-2 në 3-2 në Kupë. Këto përmbysje sollën sërish në skenë frymën e famshme të “Interit të çmendur”.

Nëse Interi do të mbyllë shpejt garën për titull, do të ketë kohën e duhur për t’u përgatitur për finalen e Kupës së Italisë, që do të jetë e 16-ta në historinë e klubit. Një sezon që nisi me dyshime, por që tani mund të përfundojë në mënyrën më të lavdishme të mundshme, me Chivu që ka dalë plotësisht nga hija e së kaluarës dhe po ndërton historinë e tij.