Lionel Messi ka shkaktuar një valë të madhe entuziazmi në futbollin katalanas pas lajmit surprizë për blerjen e UE Cornellà-s, duke e kthyer klubin në qendër të vëmendjes botërore.

Vetëm pak orë pasi Messi kishte shkëlqyer me dy gola për Inter Miami-n në ndeshjen ndaj Colorado Rapids, u konfirmua lajmi se ai është bërë pronar i klubit spanjoll. Ky zhvillim tronditi ambientin sportiv dhe solli një rritje të menjëhershme të interesit për Cornellà-n.

Reagimi në rrjetet sociale ishte i jashtëzakonshëm. Brenda pak ditësh, klubi katalanas rriti ndjekësit në Instagram në rreth 570 mijë, duke kaluar edhe RCD Espanyol dhe duke u bërë ndër klubet më të ndjekura në Katalunjë, pas Barcelonës dhe Girona-s.

Në ndeshjen e parë pas këtij lajmi, stadiumi “Municipal de Cornellà” u mbush me atmosferë festive, ku tifozët folën më shumë për Messin sesa për vetë ndeshjen kundër Gramenet. Madje jashtë stadiumit u shitën fanella me numrin 10 dhe emrin e argjentinasit, një simbol i qartë i “epokës së re”.

Tifozët reaguan me habi dhe emocion ndaj lajmit. Shumë prej tyre fillimisht menduan se bëhej fjalë për një lajm të rremë, ndërsa të tjerë e konfirmuan përmes fëmijëve që ndjekin akademinë e klubit.

Edhe brenda klubit, reagimet ishin pozitive. Trajneri i ekipit e cilësoi këtë si një moment historik, duke theksuar se lidhja e Messit me klubin është një mundësi e madhe për të ardhmen.

Megjithatë, në aspektin sportiv, debutimi i “epokës Messi” nuk solli fitore, pasi Cornellà barazoi 1-1. Golin e parë të kësaj faze e realizoi Gonzalo Pereira, duke hyrë kështu në histori si shënuesi i parë i klubit në këtë kapitull të ri.

Pavarësisht rezultatit, entuziazmi në klub është në kulm, ndërsa tifozët presin me padurim të shohin se si do të ndikojë emri i Messit në të ardhmen sportive dhe ekonomike të Cornellà-s.