Parma hodhi një hap vendimtar drejt mbijetesës në Serie A, pasi mposhti 1-0 Udinesn në javën e 33-të. Skuadra e drejtuar nga Carlos Cuesta tashmë ndodhet +12 pikë larg zonës së rënies, duke e bërë qëndrimin në elitë pothuajse të sigurt.

Ndeshja nisi me ritëm të ulët, me të dyja skuadrat që treguan kujdes në fazën mbrojtëse. Raste të izoluara u krijuan nga Circati dhe Zaniolo, ndërsa mundësia më e mirë në pjesën e parë erdhi nga Atta, por pa rezultat. Fraksioni i parë u mbyll pa gola, me ekipet që dukeshin të barabarta në lojë.

Momenti vendimtar erdhi në fillimin e pjesës së dytë. Pas daljes së Pellegrinos për shkak marramendjeje, në fushë u fut Elphege, i cili ndryshoi gjithçka. Në minutën e 51-të, sulmuesi realizoi një gol të bukur: kontroll i saktë pas asistit të Strefezzas dhe finalizim me të majtën për të mposhtur portierin Okoye, duke kaluar Parmën në avantazh 1-0.

Vendasit ishin pranë golit të dytë sërish me Elphege, por në minutat e fundit ishte Udinese që shtoi presionin. Solet dhe Zaniolo humbën një rast të artë, ndërsa Suzuki bëri një pritje vendimtare në sekondat e fundit, duke ruajtur avantazhin.

Me këtë fitore, Parma shkon në 39 pikë dhe sheh shumë pranë mbijetesën, ndërsa Udinese mbetet në mesin e tabelës me 43 pikë, pa objektiva të qartë në fundin e sezonit.