Krenaria e futbollit italian në Evropë mbetet në duart e Bologna-s dhe Fiorentinës, dy skuadrat e fundit që përfaqësojnë Italinë në kupat evropiane. Në UEFA Europa League, Bologna pret Aston Villa-n, ndërsa në UEFA Europa Conference League Fiorentina udhëton drejt Londrës për t’u përballur me Crystal Palace.

Pas 27 vitesh, Bologna rikthehet në një moment të madh evropian, duke synuar një rezultat historik ndaj skuadrës angleze të drejtuar nga Unai Emery, një specialist i këtij kompeticioni. Trajneri Vincenzo Italiano shprehet optimist: “Kualifikimi është 50 me 50, këtë herë historia mund të jetë ndryshe”. Edhe pse mungojnë disa lojtarë të rëndësishëm si Łukasz Skorupski dhe Thijs Dallinga, skuadra mbështetet te forca e publikut në “Dall’Ara” për të bërë diferencën.

Në fushë pritet një formacion i balancuar, me Remo Freuler dhe Lewis Ferguson në mesfushë, ndërsa në sulm do të jetë treshja Federico Bernardeschi, Santiago Castro dhe Jonathan Rowe, që synon të çajë mbrojtjen angleze.

Ndërkohë, Fiorentina kërkon të vazhdojë traditën e mirë në Conference League, edhe pse këtë sezon në kampionat ka hasur vështirësi. Trajneri Paolo Vanoli ka qenë i qartë: “Nuk dua alibi, është një sfidë e vështirë por edhe shumë motivuese”.

Mungesa e Moise Kean pritet të ndihet, ndërsa në sulm do të aktivizohet Roberto Piccoli, i mbështetur nga Albert Guðmundsson. Rreth 1600 tifozë nga Toscana do të jenë në Londër, duke shpresuar që “magjia” e kupave të fshijë zhgënjimet e kampionatit dhe të rikthejë Fiorentinën drejt një trofeu që mungon prej shumë vitesh.

Dy sfida të vështira, por me shumë shpresë për futbollin italian në arenën evropiane.