Antonio Conte është shumë pranë një rikthimi në krye të Kombëtares italiane, duke u konsideruar si kandidati kryesor për të zëvendësuar Gennaro Gattuson. Edhe pse mungojnë ende formalitetet, gjithçka duket se po shkon drejt një “bis”-i për trajnerin aktual të Napolit, i cili ka dhënë një miratim paraprak për këtë rol. Objektivi afatgjatë do të jetë rikthimi i Italisë në majat e futbollit botëror, me synimin për Kupën e Botës 2030.

Pas një dekade të mbushur me suksese dhe presion të madh, Conte duket i gatshëm për këtë sfidë të re. Ai mbetet një nga trajnerët më të suksesshëm të Italisë pas epokës së Marcello Lippi, së bashku me Roberto Mancinin.

Nga ana tjetër, presidenti i Napolit, Aurelio De Laurentiis, nuk do ta pengojë largimin e Contes, pavarësisht kontratës në fuqi. Ai tashmë po mendon për pasuesin dhe emri më i përfolur është Vincenzo Italiano, aktualisht trajner i Bologna-s, i cili ka bërë një punë shumë të mirë vitet e fundit.

Në fushë, Interi është rikthyer te fitorja falë rikthimit të kapitenit Lautaro Martínez, duke mposhtur Romën dhe duke forcuar pozitat në garën për titullin kampion. Kjo fitore ul disi peshën e përballjes së madhe mes Napolit dhe Milanit, e cila tashmë shihet më shumë si një “finale” për vendin e dytë.

Megjithatë, sfida mbetet shumë interesante, edhe për duelët individualë në distancë mes ‘yjeve’ si Kevin De Bruyne dhe Luka Modrić.

Në krahun tjetër, situata është më e vështirë për Gian Piero Gasperinin, i cili po përballet me kritika të shumta. Ekipi i tij ka dështuar në disa objektiva këtë sezon dhe rrezikon edhe një vend në Champions. Eliminimet dhe rezultatet negative kanë rritur presionin mbi trajnerin, ndërsa Roma po shfaq dobësi të papritura, duke humbur edhe identitetin e saj karakteristik.

Sezoni po hyn në fazën vendimtare, me shumë pikëpyetje dhe zhvillime që mund të ndryshojnë fatin e skuadrave kryesore në Itali.