Sulmuesi belg, Romelu Lukaku, ka vendosur të vijojë procesin e rehabilitimit në Belgjikë, nën drejtimin e kinesiterapistit Lieven Maesschalck, i cili ka ndihmuar më parë edhe Kevin De Bruyne në rikuperimin e tij. Lajmi u raportua nga media lokale ‘Sporza’, sipas së cilës Lukaku preferon të qëndrojë në vendin e tij për t’u rikuperuar plotësisht, duke refuzuar kthimin te Napoli.

Klubi italian ka dhënë një ultimatum, i cili pritet të vendoset të martën: nëse Lukaku nuk do të paraqitet në Castel Volturno për rifillimin e stërvitjeve, Napoli nuk përjashton mundësinë e gjobës dhe madje edhe përjashtimin teknik nga ekipi. Deri tani nuk ka pasur një deklaratë zyrtare nga klubi, por qëndrimi i lojtarit nuk është pritur mirë, dhe në rast se ai konfirmon qëndrimin në Belgjikë, mund të ketë një reagim nga presidenti Aurelio De Laurentiis.

Sot Lukaku ka dalë në publik përmes një komunikate në rrjetet e tij sociale, ku shpjegoi se sezoni i fundit ka qenë shumë i vështirë për të. Ai theksoi se problemet e tij kanë qenë si fizike, për shkak të një dëmtimi, ashtu edhe personale, për shkak të një humbjeje të rëndë që e ka prekur thellë. Lojtari nënvizoi se vendimi i tij nuk është një ‘kryengritje’ ndaj klubit të Napolit, por një zgjedhje për t’u rikuperuar sa më mirë.