Nuk pritej kurrë që himni i garës më prestigjioze evropiane për klube të jehonte ndonjëherë në një fshat modest skandinav. Por kjo do të ndodhë në shtëpinë e Mjällby-t, kampion më i papritur suedez në histori.

Skuadra nga juglindja e Suedisë do të luajë dy ndeshje paraeliminatore të Ligës së Kampionëve në stadiumin e saj të vogël, Strandvallen, konfirmoi UEFA. Përfaqësuesit e klubit ndanë lajmin me entuziazëm në llogarinë zyrtare në rrjetin X: “Tani është zyrtare: vendi i ndeshjeve kualifikuese të verës për Mjällby AIF në garat evropiane është… Strandvallen!”

Një stadium më i madh se vetë fshati

Stadiumi ‘Strandvallen’ do të përjetojë një gjallëri të jashtëzakonshme futbolli që në fund të korrikut, kur do të nisë raundi i dytë paraeliminator i kësaj gare milionëshe. Bukuria e situatës dhe kontrasti i saj theksohen nga numrat: stadiumi ka kapacitet rreth 7.000 vende, ndërsa fshati Hallevik, ku ndodhet arena, ka vetëm rreth 1.500 banorë. Nordikët tregojnë sërish se romantizmi i futbollit nuk ka vdekur plotësisht.

Leja është dhënë për raundin e dytë dhe të tretë paraeliminator (nëse skuadra arrin deri atje). Nëse kampioni suedez shkon në play-off dhe, ndoshta, në fazën e grupeve, atëherë do të duhet të luajë si mysafir në stadiumin e Helsingborgut, rreth 150 kilometra larg fshatit të vogël. Shorti i raundit të dytë paraeliminator të Ligës së Kampionëve është caktuar për 16 qershor, ndërsa ndeshja e parë do të luhet më 21 ose 22 korrik.