Irani ka marrë një vendim të fortë në fushën e sportit, duke ndaluar ekipet kombëtare dhe klubet që të udhëtojnë drejt vendeve që konsiderohen “armiqësore”. Lajmi është bërë publik nga televizioni shtetëror, pas një njoftimi zyrtar të Ministrisë së Sportit.

Ky vendim vjen në një moment të tensionuar politik, pothuajse një muaj pas sulmeve të përbashkëta të Amerikës dhe Izraelit ndaj Iranit, që nisën më 28 shkurt, duke rritur ndjeshëm pasigurinë në rajon.

Ndalesa prek drejtpërdrejt edhe futbollin aziatik. Në veçanti, ajo ka ndikuar te ndeshja e playoff-it të AFC Champions League mes Tractor dhe Shabab Al Ahli, e planifikuar të luhej në Arabinë Saudite. Autoritetet iraniane kanë sqaruar se çdo udhëtim në vende që nuk garantojnë sigurinë e sportistëve dhe stafit është i ndaluar deri në një njoftim të ri.

Megjithatë, deklarata nuk specifikon se cilat shtete konsiderohen “armiqësore”. Federatat dhe klubet iraniane janë udhëzuar që të komunikojnë me Konfederatën Aziatike të Futbollit për të riorganizuar ndeshjet e planifikuara.

Sa i përket FIFA World Cup 2026, për momentin ky vendim nuk e prek drejtpërdrejt pjesëmarrjen e Iranit. Turneu do të zhvillohet në Kanada, Meksikë dhe Shtetet e Bashkuara, ndërsa autoritetet iraniane po negociojnë me FIFA-n për të zhvendosur ndeshjet e fazës së grupeve jashtë territorit amerikan, për arsye sigurie.

Presidenti i FIFA, Gianni Infantino, ka konfirmuar se turneu do të zhvillohet sipas planit, pavarësisht situatës.

Ndërkohë, kombëtarja iraniane ndodhet aktualisht në Turqi, ku po përgatitet për ndeshjet miqësore ndaj Nigerisë dhe Kosta Rikës. Autoritetet sportive kanë theksuar se nuk ka qëllim bojkotimi të Botërorit, por kanë pranuar se, për momentin, udhëtimi drejt SHBA-së mbetet problematik për shkak të tensioneve politike.