Trajneri i Bayern Munich, Vincent Kompany, ka konfirmuar se sulmuesi anglez Harry Kane ka pësuar një lëndim në pulpë dhe për këtë arsye nuk do të jetë i gatshëm për ndeshjen e radhës në Bundesligë.

Tekniku belg foli në konferencë për shtyp para sfidës ndaj Borussia Mönchengladbach, duke shpjeguar gjendjen e kapitenit të Anglisë.

“Kane e ka marrë një goditje në pulpë dhe ende nuk është rikuperuar plotësisht. Është vetëm një goditje, asgjë serioze për momentin, por ndoshta duhen disa ditë që ai të jetë gati për të luajtur”, deklaroi Kompany.

Për këtë arsye, sulmuesi anglez nuk do të marrë pjesë në sfidën e kampionatit, megjithëse stafi i klubit bavarez mbetet i qetë për gjendjen e tij fizike.

“Jemi mjaft të qetë për situatën. Sigurisht që do të donim ta kishim në dispozicion, por këto gjëra ndodhin”, shtoi trajneri i Bayernit.

Megjithatë, lajmet nga Mynihu janë relativisht pozitive për sfidën e rëndësishme në Evropë.

Sipas Kompany, ekziston optimizëm që Kane të jetë i gatshëm për përballjen ndaj Atalantës në ndeshjen e parë të së tetës së finales së Champions League, e cila do të luhet javën e ardhshme.

Në këtë sezon, Kane ka qenë një nga protagonistët absolutë të Bayernit.

Ai ka realizuar 30 gola në 24 ndeshje në Bundesligë dhe është një nga kandidatët kryesorë për ta thyer rekordin historik të golave në një sezon të kampionatit gjerman, që mbahet nga ish-sulmuesi i bavarezëve Robert Lewandowski me 41 gola.

Mungesa e tij në kampionat është një goditje për Bayernin, por klubi shpreson që sulmuesi anglez të rikuperohet në kohë për sfidën e madhe evropiane kundër Atalantës.