Boksierja algjeriane, Imane Khelif, ka zbuluar se para Lojërave Olimpike “Paris 2024” iu nënshtrua trajtimeve hormonale për të ulur nivelin e testosteronit. Në një intervistë për gazetën franceze L’Equipe, kampionia olimpike theksoi qartë se nuk është transgjinore dhe se ka garuar gjithmonë sipas rregullave.

Khelif, 26 vjeçe, fitoi medaljen e artë në kategorinë e femrave deri në 66 kilogramë, por gjatë Lojërave u përfshi në një debat të madh mbi gjininë, ashtu si edhe boksierja nga Tajvani, Lin Yu-ting, fituese e arit në peshën 57 kg.

“Unë kam hormone femërore, por për gara kam marrë trajtime hormonale për të ulur nivelin e testosteronit,” u shpreh Khelif. Ajo konfirmoi gjithashtu se ka gjenin SRY, i vendosur në kromozomin Y, por shtoi se kjo është diçka natyrale dhe e monitoruar nga mjekët.

“Jam e rrethuar nga mjekë dhe profesorë që më ndjekin vazhdimisht. Për turneun kualifikues olimpik në Dakar, i ula nivelet e testosteronit deri në zero,” deklaroi ajo.

Boksierja algjeriane reagoi edhe ndaj komenteve publike që u bënë për rastin e saj, përfshirë ato nga ish-presidenti amerikan, Donald Trump, dhe shkrimtarja J.K. Rowling. “I respektoj të gjithë, por e vërteta nuk mund të shtrembërohet. Nuk jam grua trans, jam vajzë. Jam rritur si vajzë dhe gjithmonë jam njohur si e tillë,” tha Khelif.

Duke parë nga e ardhmja, ajo synon të marrë pjesë në Lojërat Olimpike “Los Angeles 2028” dhe është e gatshme t’i nënshtrohet çdo testi të detyrueshëm gjinor nga World Boxing. “Nuk kam asgjë për të fshehur. I kam dorëzuar të gjitha dokumentet mjekësore,” përfundoi ajo.