Drejtori sportiv i Milanit, Igli Tare, foli për Dazn para ndeshjes kundër Lecce-s, duke dhënë detaje mbi situatën e klubit në merkato dhe për rinovimin e portierit Mike Maignan. Tare theksoi se Milani është i vëmendshëm dhe gati të veprojë në merkato nëse do të dalin mundësi të dobishme, veçanërisht në mbrojtje, pasi çështja e sulmuesit është tashmë e zgjidhur. “Sigurisht do të qëndrojmë vigjilentë në merkato; nëse do të ketë diçka që mund të na ndihmojë, do të veprojmë. Për momentin jemi mirë ashtu si jemi”, deklaroi drejtori.

Sa i përket rinovimit të Maignan, Tare u shpreh: “Çfarë mungon? Mungon që të ulem me të dhe të gjejmë një zgjidhje. Mike ka shumë lidhje me këtë fanellë dhe klub, ndërsa klubi dëshiron të vazhdojë bashkëpunimin. Mendoj se shumë shpejt, gjatë javëve të ardhshme, do të kemi një përgjigje përfundimtare. Unë gjithmonë jam optimist për këtë çështje”.

Kjo deklaratë tregon se Milani po ndjek me kujdes planet e merkatos, por fokusi kryesor mbetet ruajtja e ‘yjeve’ ekzistues si Maignan, duke siguruar stabilitetin për pjesën e mbetur të sezonit.