Napoli po përballet me një tjetër moment të vështirë në një fazë vendimtare të sezonit. Skuadra e drejtuar nga Antonio Conte ka humbur për shkak dëmtimi dy lojtarë kyç, Matteo Politano dhe Amir Rrahmani, të cilët u detyruan të lënë fushën gjatë ndeshjes në shtëpi ndaj Sassuolos.

Në orët e paradites, të dy futbollistët iu nënshtruan ekzaminimeve mjekësore, të cilat do të plotësohen edhe nesër, por diagnoza paraprake është e njëjtë për të dy: problem muskulor në fleksor. Ende mbetet të përcaktohet shkalla e dëmtimit dhe koha e rikuperimit, por tashmë duket pothuajse e sigurt se Politano dhe Rrahmani nuk do të jenë të gatshëm për transfertën e Champions League ndaj Copenhagen-it, të martën.

Përveç kësaj, prania e tyre në supersfidën e fundjavës së ardhshme ndaj Juventusit, më 25 janar, është seriozisht në dyshim. Dy mungesa të rënda për Napolin, që ndodhet në mes të një kalendari tepër të ngjeshur dhe kërkues.

Pas ndeshjes me Juventusin, napolitanët do të presin Chelsea-n më 28 janar, gjithmonë në “Maradona”, ndërsa më 31 janar do të përballen me Fiorentinën. Më pas, pas një cikli prej katër ndeshjesh në vetëm 11 ditë, skuadra do të udhëtojë në Marassi për sfidën ndaj Genoa-s më 7 shkurt.

Rikuperimi i lojtarëve të dëmtuar do të jetë vendimtar për Napolin, që synon të mos humbasë terren ndaj Interit dhe të vazhdojë rrugëtimin në Champions League. Në këtë kuadër, Neres duket lojtari më pranë rikthimit.