Ernest Muçi po jeton momentin më të mirë të karrierës së tij dhe këtë e konfirmoi edhe në javën e 18-të të Superligës turke, ku me një gol fenomenal në sekondat e fundit i dhuroi Trabzonsporit një fitore jetike në transfertë ndaj Kocaelisporit, 2–1. Një goditje vendimtare në minutën 90+1, që ndezi festën e miqve dhe heshti stadiumin në Kocaeli.

Ndeshja nisi më mirë për vendasit, të cilët kaluan në avantazh që në minutën e 18-të me Bruno Petković. Trabzonspori reagoi para pushimit, duke barazuar shifrat në minutën e 44-t me Felipe Auguston. Por momenti që vendosi gjithçka erdhi në fund, kur Muçi mori përgjegjësinë dhe me një finalizim të jashtëzakonshëm i dha ekipit të tij fitoren dramatike.

Sulmuesi shqiptar po shpërthen në muajt e fundit dhe është kthyer në një nga lojtarët më vendimtarë të Trabzonsporit. Në elitën e futbollit turk këtë sezon, Muçi tashmë numëron tetë gola dhe një asist (dy gola të tjerë i ka shënuar në Kupë), shifra që flasin qartë për ndikimin e tij në lojë. Forma e tij e shkëlqyer ka qenë vendimtare edhe për t’i dhënë fund serisë negative të Trabzonsporit, që tani ka ngjitur kuotën e 39 pikëve.

Ky shpërthim nuk është vetëm lajm i madh për klubin turk, por edhe një mesazh i drejtpërdrejtë për trajnerin e Kombëtares shqiptare, Sylvinho, në prag të ndeshjeve të marsit. Muçi po tregon se është gati të bëjë diferencën, qoftë në Turqi, qoftë me fanellën kuqezi.

Ernest Muçi scores at stoppage times.

🇹🇷 Kocaelispor 1-2 Trabzonsporpic.twitter.com/1HmYRuDvUJ

— Goals Xtra (@GoalsXtra) January 18, 2026